નવાગામ, લોલિયાણા અને કાળાતળાવ જળમગ્ન
વરસાદના કારણે નવાગામ, લોલિયાણા, કાળાતળાવ સહિતના ગામોમાં પાણી ભરાઈ જતા ગામના રસ્તાઓ પાણીમાં ગરકાવ થઈ ગયા છે. કેટલાક વિસ્તારોમાં ઘરો અને ખેતીવાડી જમીનમાં પણ પાણી ઘૂસ્યાના અહેવાલો સામે આવ્યા છે. સતત વરસતા વરસાદને કારણે ગ્રામજનોમાં ભયનો માહોલ જોવા મળી રહ્યો છે.
ઘેલો અને લિંડીઓ નદીમાં પૂર, સંપર્ક તૂટ્યો
તાલુકાની તમામ નદીઓ હાલ બે કાંઠે વહેતી થઈ છે. ખાસ કરીને ઘેલો અને લિંડીઓ નદીમાં ભારે પૂર આવતાં લોલિયાણા ગામનો તાલુકા મુખ્ય મથક સાથેનો માર્ગ સંપર્ક તૂટી ગયો છે. પાણીના જોરદાર પ્રવાહને કારણે વાહન વ્યવહાર સંપૂર્ણપણે બંધ થઈ ગયો છે, જેના કારણે સ્થાનિક લોકો મુશ્કેલીમાં મુકાયા છે.
તંત્ર સામે લોકોમાં રોષ
સ્થાનિક લોકોનો આરોપ છે કે વરસાદ અને પાણી ભરાવાની ગંભીર સ્થિતિ હોવા છતાં તંત્ર દ્વારા સમયસર યોગ્ય કામગીરી હાથ ધરવામાં આવી નથી. ગામોમાં પાણી ભરાયા બાદ પણ નિકાલ માટે પૂરતી વ્યવસ્થા કરવામાં આવી નથી, જેના કારણે લોકોમાં રોષ અને ચિંતા બંને જોવા મળી રહ્યા છે.
શેત્રુંજી ડેમના દરવાજા ફરી ખોલાયા
ઉપરવાસમાં ભારે વરસાદને કારણે શેત્રુંજી ડેમમાં પાણીની આવક સતત વધી રહી છે. મળતી માહિતી અનુસાર હાલ ડેમમાં અંદાજે 1800 ક્યુસેક પાણીનો ઈનફલો શરૂ થયો છે. પરિસ્થિતિને ધ્યાનમાં રાખીને રાત્રિના લગભગ 11 વાગ્યે ડેમના દરવાજા ફરી ખોલવામાં આવ્યા હતા.
પાલિતાણા અને તળાજાના ગામોને એલર્ટ
ડેમમાંથી પાણી છોડવામાં આવતા પાલિતાણા તાલુકાના મેઢા, લાપાળીયા અને લાખાવાડ ગામોને એલર્ટ પર રાખવામાં આવ્યા છે. ઉપરાંત તળાજા તાલુકાના ભેગાળી, દાત્રાડ અને ગોરખી ગામોમાં પણ તંત્ર દ્વારા ચેતવણી આપવામાં આવી છે. નદીના પટ અને નીચાણવાળા વિસ્તારોમાં રહેતા લોકોને સાવચેત રહેવા અને નદીથી દૂર રહેવા સૂચના આપવામાં આવી છે.
વધુ વરસાદની શક્યતા વચ્ચે તંત્ર સતર્ક
હવામાન વિભાગ દ્વારા હજુ પણ વધુ વરસાદની શક્યતા વ્યક્ત કરવામાં આવી રહી છે. તેથી વલ્લભીપુર તેમજ શેત્રુંજી નદી કિનારાના વિસ્તારોમાં તંત્રને હાઈ એલર્ટ પર રાખવામાં આવ્યું છે. જો ઉપરવાસમાં વરસાદ યથાવત રહેશે તો આગામી કલાકોમાં પાણીની સ્થિતિ વધુ ગંભીર બની શકે છે. તંત્ર દ્વારા લોકોને અનાવશ્યક બહાર ન નીકળવા અને સત્તાવાર સૂચનાઓનું પાલન કરવા અપીલ કરવામાં આવી છે.
આ પણ વાંચોઃ Kheda Rain Update: વસોમાં ધોધમાર વરસાદ, મલીયાતજમાં અંદાજે 100 વર્ષ જૂનું વડનું વૃક્ષ ધરાશાયી
આ પણ વાંચોઃ Surat માં ભારે વરસાદથી ભટાર વિસ્તાર પાણીમાં ગરકાવ, વેપારીઓમાં રોષ ફેલાયો
