લ્યો બોલો... શિક્ષકે Dummy Student બની 2 પેપર આપ્યા તો પણ ખબર ના પડી! આ રીતે થયો પર્દાફાશ

કઈ રીતે ખુલ્યું કૌભાંડ?

આ સમગ્ર કૌભાંડ જિલ્લા શિક્ષણ અધિકારીની કચેરીના નિરીક્ષક દિનેશ સોલંકી (Dinesh Solanki) ના ધ્યાન પર આવ્યું હતું. પરીક્ષા કેન્દ્ર પર શંકા જતાં તેમણે ઊંડાણપૂર્વક તપાસ હાથ ધરી હતી. સીટ નંબર, પરીક્ષાની રસીદ અને પરીક્ષા હોલના સીસીટીવી ફૂટેજની ઝીણવટભરી ચકાસણી કરવામાં આવી હતી. દસ્તાવેજોની ચકાસણીમાં સામે આવ્યું કે જે વિદ્યાર્થી હોલમાં બેઠો હતો, તેનો ચહેરો અને ઓળખ અસલ ઉમેદવાર સાથે મેળ ખાતી નહોતી.

શિક્ષકે જ વિદ્યાર્થી બનીને આપી પરીક્ષા

તપાસમાં બહાર આવ્યું છે કે ધાર્મિક ઢાપા (Dharmik Dhapa) નામના કરાર આધારિત શિક્ષકે અન્ય વિદ્યાર્થીના નામે પરીક્ષા આપી હતી. આ કૌભાંડમાં કુલ બે પેપરોનો સમાવેશ થાય છે. 27 ફેબ્રુઆરીના રોજ માળિયા (Maliya) ગામની મધુમતી સ્કૂલમાં તત્વજ્ઞાન (Philosophy) નું પેપર અને ત્યારબાદ 13 માર્ચના રોજ  જાફરી & ફાતિમા સ્કૂલમાં ભૂગોળ (Geography) નું પેપર આ ડમી શિક્ષકે આપ્યું હોવાનું ખુલ્યું છે.

આ પણ વાંચોઃ Ahmedabad: પદયાત્રી સંઘને બાવળા-બગોદરા હાઈવે પર અજાણ્યા વાહને મારી ટક્કર, એક યાત્રિકનું મોત

પોલીસ કાર્યવાહી તેજ

આ ગંભીર બેદરકારી અને ગુનાહિત કૃત્ય બદલ નિરીક્ષકે મહુવા ટાઉન પોલીસ સ્ટેશનમાં ફરિયાદ નોંધાવી છે. પોલીસે ધાર્મિક ઢાપા (Dharmik Dhapa) અને અન્ય એક રાહુલ જીતુભાઈ શિયાળ (Rahul Jitubhai Shiyal) વિરુદ્ધ ગુનો નોંધી કાયદેસરની કાર્યવાહી હાથ ધરી છે. હાલ પોલીસ એ દિશામાં તપાસ કરી રહી છે કે આ ડમી વિદ્યાર્થી બેસાડવા પાછળ કોઈ મોટો આર્થિક સોદો થયો હતો કે કેમ, અથવા અન્ય કોઈ વ્યક્તિઓ આ કૌભાંડમાં સામેલ છે કે નહીં.

આ પણ વાંચોઃ Kheda Land Scam: કૌભાંડી શિક્ષક આશિષ પટેલ સસ્પેન્ડ, જાણો સમગ્ર મામલો