Bhavnagar: થોરડીની તલાવડીમાં ડૂબ્યા વૃદ્ધ, ભારે વરસાદ વચ્ચે NDRF નું રેસ્ક્યુ ઓપરેશન ચાલુ

બાઈક પરથી પસાર થતી વખતે બની ઘટના

મળતી માહિતી મુજબ, થોરડી ગામના દિલીપભાઈ છગનભાઈ રાઠોડ, નરેશભાઈ ભરતભાઈ જાદવ અને આશિષભાઈ પ્રવીણભાઈ જાદવ બાઈક પર પસાર થઈ રહ્યા હતા. આ સમયે ભારે વરસાદના કારણે તલાવડીમાં પાણીનું સ્તર વધી ગયું હતું. માર્ગ પરથી પસાર થતી વખતે અચાનક દિલીપભાઈ રાઠોડ પાણીમાં તણાઈને તલાવડીમાં ગરકાવ થઈ ગયા. સદનસીબે, તેમની સાથે રહેલા અન્ય બે વ્યક્તિઓનો આબાદ બચાવ થયો છે.

તંત્ર અને નેતાઓની તાત્કાલિક દોડધામ

ઘટનાની જાણ થતાં જ ભાવનગર ગ્રામ્યના ધારાસભ્ય અને રાજ્યકક્ષાના મંત્રી પરસોત્તમભાઈ સોલંકીના પીએ (PA) બુધેસભાઈ જાંબુચા તાત્કાલિક ઘટનાસ્થળે પહોંચ્યા અને સ્થિતિનો તાગ મેળવ્યો. બનાવની ગંભીરતાને ધ્યાને લઈ ભાવનગર મામલતદાર (Mamlatdar), સ્થાનિક સરપંચ, ફાયર વિભાગ (Fire Department) અને NDRF ની ટીમને તાત્કાલિક જાણ કરવામાં આવી હતી.

શોધખોળ ચાલુ

હાલ ઘટનાસ્થળે NDRF ની ટીમ અને ફાયર વિભાગ દ્વારા બોટની મદદથી દિલીપભાઈ રાઠોડને શોધવા માટે સતત પ્રયાસો કરવામાં આવી રહ્યા છે. ગામના આગેવાનો અને મોટી સંખ્યામાં સ્થાનિક લોકો પણ શોધખોળમાં મદદરૂપ થઈ રહ્યા છે. ભારે વરસાદ અને પાણીના વધુ પ્રવાહને કારણે શોધખોળમાં મુશ્કેલી પડી રહી છે, તેમ છતાં તંત્ર દ્વારા આખા વિસ્તારમાં સઘન તપાસ ચાલુ રાખવામાં આવી છે.

આ પણ વાંચોઃGandhinagar: દહેગામના હાલીસા ગામે કરુણ ઘટના, જીવતો વીજ વાયર મહિલા પર પડતાં ઘટનાસ્થળે જ મોત