ભાવનગર લઠ્ઠાકાંડમાં SMCને મળી મોટી સફળતા, મિથેનોલનો જથ્થો દિલ્હીથી મોકલાયોનો ખુલાસો

દિલ્હીમાં ત્રણ આરોપીઓ ઝડપાયા

તપાસના તાર દિલ્હી સુધી પહોંચ્યા બાદ પોલીસે ત્રણ આરોપીઓને ઝડપી પાડ્યા છે. પોલીસ દ્વારા ત્રણેય આરોપીઓના ટ્રાન્ઝિટ રિમાન્ડ (Transit Remand) મેળવવામાં આવ્યા છે. હવે તેમને ગુજરાત લાવી આગળની પૂછપરછ અને તપાસ હાથ ધરવામાં આવશે.

પ્રમોદકુમાર બુડાકોટી પાસેથી મિથેનોલ વેચાણ

તપાસમાં સામે આવેલી માહિતી મુજબ દિલ્હીના પ્રમોદકુમાર બુડાકોટીએ મિથેનોલનો જથ્થો વેચ્યો હતો. ત્યારબાદ આ જથ્થો દિલ્હીના રોહિત પ્રધાન અને કેશવ જાટવ સુધી પહોંચ્યો હતો. બંનેએ જથ્થો ટ્રાન્સપોર્ટ મારફતે અમદાવાદ પહોંચાડ્યો હોવાનું તપાસમાં બહાર આવ્યું છે.

અમદાવાદ સુધી પહોંચ્યો હતો જથ્થો

મિથેનોલ દિલ્હીમાં વેચાયા બાદ ટ્રાન્સપોર્ટ મારફતે અમદાવાદ પહોંચાડવામાં આવ્યો હતો. ત્યારબાદ આ જથ્થો ભાવનગર લઠ્ઠાકાંડ સાથે કેવી રીતે અને કોના માધ્યમથી જોડાયો તેની તપાસ એજન્સીઓ કરી રહી છે. મિથેનોલની ખરીદીથી લઈને તેના પરિવહન અને અંતિમ ઉપયોગ સુધીની કડીઓ જોડવાના પ્રયાસો ચાલી રહ્યા છે.

અત્યાર સુધી 31 આરોપીઓની ધરપકડ

ભાવનગર લઠ્ઠાકાંડમાં પોલીસની કાર્યવાહી સતત આગળ વધી રહી છે. અત્યાર સુધી કુલ 31 આરોપીઓની ધરપકડ કરવામાં આવી હોવાનું સામે આવ્યું છે. હવે દિલ્હીથી ઝડપાયેલા ત્રણ આરોપીઓની પૂછપરછ બાદ મિથેનોલ સપ્લાય નેટવર્ક અંગે વધુ મહત્વની વિગતો બહાર આવવાની શક્યતા છે.તપાસનો વ્યાપ વધતા લઠ્ઠાકાંડ પાછળના મિથેનોલ સપ્લાય અને પરિવહનનું સમગ્ર નેટવર્ક તપાસના કેન્દ્રમાં આવ્યું છે.