યોજનાની જગ્યાને બદલે મેદાનમાં ખનન કર્યું!
મળતી માહિતી મુજબ વર્ષ 2018 માં પરવડી ગામના યુવાનોના રમતગમત અને શારીરિક વિકાસ માટે તંત્ર દ્વારા એક વિશાળ મેદાનની ફાળવણી કરવામાં આવી હતી. છેલ્લા કેટલાક વર્ષોથી સ્થાનિક બાળકો અને રમતવીરો આ મેદાનનો ઉપયોગ કરતા હતા. જો કે આક્ષેપ છે કે તાજેતરમાં સરકારની સુજલામ સુફલામ યોજના હેઠળ વિસ્તારમાં જળાશય કે અન્ય નિયત સ્થળે ખોદકામ અને માટીકામની મંજૂરી આપવામાં આવી હતી. આ મંજૂરીની આડમાં કેટલાક તત્વોએ યોજનાના નિયમોનું સરેઆમ ઉલ્લંઘન કર્યું હતું. દર્શાવેલી મૂળ જગ્યા પર કામ કરવાના બદલે, આ તત્વોએ પરવડી ગામના રમતગમતના મેદાન પર જેસીબી અને ડમ્પર જેવા ભારે મશીનો ઉતારી દીધા હતા અને મોટા પાયે ખોદકામ શરૂ કરી દીધું હતું.
અંદાજે ગાડીના 1700 થી વધુ ફેરા કરી માટી વેચી દેવાઈ
સ્થાનિક સૂત્રોના જણાવ્યા અનુસાર આ રમતગમતના મેદાનમાંથી અંદાજે 1700 થી વધુ ગાડી (ડમ્પર) ભરીને કિંમતી માટીનું ગેરકાયદેસર ઉત્ખનન કરવામાં આવ્યું છે. મેદાનની પવિત્ર માટીને બારોબાર વેચી દઈને આર્થિક ફાયદો મેળવવામાં આવ્યો છે, જેના કારણે રમતગમતનું આખું મેદાન મોટા ખાડાઓમાં ફેરવાઈ ગયું છે અને રમતવીરો માટે બિનઉપયોગી બની ગયું છે. સરકારી યોજનાના નામે ચાલી રહેલી આ ગેરકાયદેસર પ્રવૃત્તિ પર ગામના જ એક જાગૃત નાગરિક વિશાલભાઈ પરમારની નજર પડી હતી. તેમણે તાત્કાલિક આ બાબતે સજાગતા દાખવીને સમગ્ર કૌભાંડ અંગે ભૂસ્તર વિજ્ઞાન અને ખનીજ વિભાગને લેખિત તથા મૌખિક જાણ કરી હતી.
ખનીજ વિભાગની ટીમ તપાસ માટે પહોંચી
જાગૃત નાગરિકની ફરિયાદના આધારે ભાવનગર ખનીજ વિભાગની ટીમ તાત્કાલિક હરકતમાં આવી હતી. ખનીજ વિભાગના અધિકારીઓ અને સર્વેયરની કાફલો પરવડી ગામના રમતગમતના મેદાન ખાતે ઘટના સ્થળે પહોંચ્યો હતો. અધિકારીઓએ સ્થળ પર જઈને ગેરકાયદે થયેલા ખનનની ઊંડાઈ અને વિસ્તારની માપણી હાથ ધરી હતી. ખનીજ વિભાગની આ ત્વરિત કાર્યવાહીથી ખનન માફિયાઓમાં ફફડાટ વ્યાપી ગયો છે. હાલ તંત્ર દ્વારા આ મામલે કેટલા ટન માટીની ચોરી થઈ છે તેની ચોક્કસ ગણતરી કરીને જવાબદારો સામે કડક કાયદાકીય પગલાં અને મોટો દંડ ફટકારવાની તજવીજ હાથ ધરવામાં આવી છે.
આ પણ વાંચોઃ Surendranagar: સાયલામાં ભૂમાફિયાઓના નેટવર્કનો પર્દાફાશ, DIG ની ટીમના દરોડાથી ખળભળાટ
