આપદાઓ સામે ચિત્રકૂટધામ હંમેશા તત્પર
પૂજ્ય મોરારિબાપુની સંવેદના કોઈ ચોક્કસ ભૌગોલિક સીમાઓ પૂરતી મર્યાદિત નથી. પ્રદેશ, દેશ કે દુનિયાના કોઈપણ ખૂણે જ્યારે પણ કોઈ કુદરતી કે માનવસર્જિત આપત્તિ, અકસ્માત અથવા હોનારત સર્જાય છે, ત્યારે પૂજ્ય બાપુ અને ચિત્રકૂટધામ આશ્રમ દ્વારા પીડિતોની વહારે આવીને ત્વરિત સહાય પૂરી પાડવામાં આવે છે. આ જ પરંપરાને જાળવી રાખીને વર્તમાનમાં સર્જાયેલી સ્થાનિક દુર્ઘટનાઓથી પ્રભાવિત પરિવારોને આશ્ર્વાસન અને આર્થિક ટેકો આપવાનો સરાહનીય પ્રયાસ કરવામાં આવ્યો છે.
પ્રત્યેક મૃતકના વારસદારને ₹15,000 ની સહાય
આ સત્તાવાર યાદી અનુસાર, રાજ્યની અલગ-અલગ સાત જેટલી ગંભીર ઘટનાઓમાં જે 19 લોકોએ પોતાના જીવ ગુમાવ્યા છે, તેમના આશ્રિત અને વારસદાર પરિવારોને માથાદીઠ રૂપિયા 15,000 લેખે આર્થિક મદદ મોકલવામાં આવી રહી છે. બાપુના આ કલ્યાણકારી કાર્યનો ઉદ્દેશ્ય મુશ્કેલ સમયમાં શોકગ્રસ્ત પરિવારો પર આવી પડેલા આર્થિક બોજને હળવો કરવાનો છે.
વિવિધ જિલ્લાઓમાં બનેલી કરુણ ઘટનાઓની વિગત
છેલ્લા કેટલાક દિવસોમાં રાજ્યના જુદા-જુદા વિસ્તારોમાં બનેલી દુર્ઘટનાઓ બની હતી જેમાં ભાવનગરના મહુવા (Mahuwa) તાલુકાના છાપરી ગામે વાડી વિસ્તારમાં ખૂંખાર દીપડાએ કરેલા હુમલામાં 1 માસૂમ બાળકનું મોત નીપજ્યું હતું. તેમજ ભાવનગરમાં રામદરબારથી ઘરે પરત ફરી રહેલા 2 વ્યક્તિઓ પણ કાળનો કોળિયો બન્યા હતા. મોરબી-હળવદ માર્ગ પર ચરાડવા ગામ નજીક સર્જાયેલા ગંભીર વાહન અકસ્માતમાં (Road Accident) રણછોડગઢ ગામના 5 નાગરિકોએ સ્થળ પર જ જીવ ગુમાવ્યો હતો.
તો બીજી તરફ ગોંડલ તાલુકાના શેમળા ગામે આવેલા ઓરિયા તળાવમાં (Oriya Lake) ન્હાવા પડેલા 3 બાળકો ડૂબી જતાં કરુણ મોતને ભેટ્યા હતા.બનાસકાંઠાના અંબાજી (Ambaji) પાસે આવેલા પાનસા રીંછડી ગામના તળાવમાં ડૂબી જવાથી અન્ય 3 બાળકોના પણ મોત થયા હતા. સિદ્ધપુરના દેથલી ચોકડી પાસે એક અજાણ્યા વાહનની અડફેટે આવતાં 1 પરપ્રાંતીય શ્રમિકનું કરુણ અવસાન થયું હતું. હીરા અને ટેક્સટાઈલ હબ ગણાતા સુરતના ખાંડ બજાર વિસ્તારમાં આવેલા એક કારખાનામાં સર્જાયેલી દુર્ઘટનામાં 4 શ્રમિકોના (4 Laborers) શ્વાસ રૂંધાવાથી અથવા અકસ્માતથી કરુણ મોત નીપજ્યા હતા.
દુઃખની ઘડીમાં પરિવારોને સાંત્વના
આ તમામ બનાવોમાં મૃત્યુ પામેલા લોકોના પરિવારો સાથે સંવાદ સાધીને આશ્રમ દ્વારા ઊંડી સંવેદના પ્રગટ કરવામાં આવી છે. સ્થાનિક અગ્રણીઓ મારફતે આ સહાયની રકમ સીધી જરૂરિયાતમંદ પરિવારો સુધી પહોંચાડવાની વ્યવસ્થા ગોઠવવામાં આવી છે. મોરારિબાપુના આ કરુણાભર્યા નિર્ણયને ગ્રામીણ જનતા અને પીડિત પરિવારોએ અત્યંત કૃતજ્ઞતાપૂર્વક આવકાર્યો છે.
આ પણ વાંચો: Gujarat Police : ‘ઓપરેશન મિલાપ’ હેઠળ એક મહિનામાં 1470 ગુમ થયેલા વ્યક્તિઓને પોલીસે શોધી કાઢયા
