Palitana: ડુંગરપુરમાં મધરાતે ઘૂસ્યો સિંહ! બજારમાં વનરાજની લટારનો વીડિયો વાયરલ

સિંહની આ ચહલપહલના દ્રશ્યો કેમેરામાં કેદ

મળતી વિગતો મુજબ, ગીરના જંગલો અને શેત્રુંજી નદીના પટ વિસ્તારમાંથી અવારનવાર વનરાજો ખોરાક અને પાણીની શોધમાં રેવન્યુ વિસ્તાર તરફ આવી જતા હોય છે. આવી જ એક ઘટના ડુંગરપુર (Dungarpur) ગામે રાત્રિના સમયે ઘટી હતી. ગામના માર્ગો પર જ્યારે સન્નાટો હતો, ત્યારે અચાનક એક કદાવર સિંહ ગામની બજારમાં આવી ચડ્યો હતો અને જાણે પોતે જંગલમાં હોય તેમ આરામથી આંટાફેરા મારવા લાગ્યો હતો. આ સમયે ગામના એક જાગૃત અને સાહસિક સ્થાનિક યુવકની નજર સિંહ પર પડતા, તેણે જરાપણ ગભરાયા વગર પોતાના મોબાઈલ કેમેરા (Mobile Camera) માં સિંહની આ ચહલપહલના દ્રશ્યો લાઈવ કેદ કરી લીધા હતા.

ગરમીમાં ખુલ્લામાં સૂતા લોકો સાવધાન

આ વાયરલ વીડિયો (Viral Video) માં સ્પષ્ટ જોઈ શકાય છે કે સિંહ કોઈ પણ ડર વગર ગામની શેરીઓમાંથી પસાર થઈ રહ્યો છે. હાલ ઉનાળાની આકરી ગરમીની સીઝન ચાલી રહી હોવાથી ગ્રામીણ વિસ્તારોમાં લોકો રાત્રિના સમયે પોતાના ઘરના આંગણામાં અથવા ફળિયામાં ખુલ્લામાં સૂતા હોય છે. સિંહની ગામમાં એન્ટ્રીના આ સમાચાર અને વીડિયો વાયરલ થતાં જ લોકોમાં ફફડાટ મચી ગયો છે. ખુલ્લામાં સૂતા પરિવારો હવે વનરાજના હુમલાના ડરથી ઘરમાં ભરાઈ રહેવા મજબૂર બન્યા છે. માલધારીઓ (Cattle Breeders) ને પણ પોતાના પશુધનના શિકાર થવાનો મોટો ભય સતાવી રહ્યો છે.

સમગ્ર પંથકમાં ફફડાટ

સ્થાનિકોના જણાવ્યા અનુસાર, પાલીતાણા (Palitana) આસપાસના ડુંગરાળ વિસ્તારોમાં અવારનવાર સિંહોનું મૂવમેન્ટ જોવા મળે છે, પરંતુ ગામની અંદર ધોળા દિવસે કે રાત્રે આ પ્રકારે વનરાજ ઘૂસી આવવાના કારણે સ્થાનિક તંત્ર સામે સવાલો ઉભા થયા છે. ગ્રામજનોએ આ અંગે વન વિભાગ (Forest Department) ને તાત્કાલિક જાણ કરી છે અને વન વિભાગની ટીમ દ્વારા આ વિસ્તારમાં સિંહનું લોકેશન ટ્રેસ કરીને રાત્રિ પેટ્રોલિંગ (Night Patroling) વધારવામાં આવે તેવી ઉગ્ર માંગ કરી છે, જેથી કોઈ અનિચ્છનીય જાનહાનિની ઘટનાને અટકાવી શકાય.

આ પણ વાંચો: AMC Demolition: ચાંદલોડિયા બ્રિજ પાસે ભારે વિરોધ અને હોબાળા વચ્ચે તોડી પડાયા બાંધકામ