Bhavnagar News: દીકરી બોલતી કરવાના નામે મહિલાએ કરી 86 હજારની ઠગાઈ

Bhavnagar News: ભાવનગરમાં અંધશ્રદ્ધા અને માતાજીના નામના ખોટા દંભનો આશરો લઈ એક મહિલાએ સામાન્ય પરિવારને નિશાન બનાવીને છેતરપિંડી આચરી છે. પ્રાપ્ત વિગતો અનુસાર, આરોપી મહિલા માધુરીબેન પરમાર ફરિયાદીના ઘરે પહોંચી હતી અને માતાજીની માનતા હોવાનું કહીને ઘરમાં પ્રવેશ કર્યો હતો. ફરિયાદીએ પૂછતા આ મહિલાએ યથાશક્તિ રોકડા, શ્રીફળ અને ચુંદડીની માંગણી કરી હતી, જેના બદલામાં ફરિયાદીએ રૂ. 50 આપ્યા હતા.

'દિકરી મહિનામાં બોલતી થઈ જશે'

આરોપી મહિલાએ પોતાની કુશળતાથી ફરિયાદીની દીકરી માનસિક અસ્વસ્થ છે તેવી વાત જાણી લીધી અને તેનો લાભ ઉઠાવવાનું નક્કી કર્યું. ફરિયાદીના વિશ્વાસને જીતવા માટે આરોપી મહિલાએ ત્યાં જ ધૂણવાનો ઢોંગ શરૂ કર્યો હતો. એટલું જ નહીં, તેણે સેક્રીન અને સુગર મિશ્રિત ગળ્યું પાણી પીવડાવીને ફરિયાદીને પૂરેપૂરા વિશ્વાસમાં લઈ લીધા હતા. આ પ્રક્રિયા બાદ આરોપીએ વિશ્વાસ અપાવ્યો હતો કે તેમની દીકરી એક જ મહિનામાં બોલતી થઈ જશે.

ફરિયાદી પાસેથી સોના-ચાંદી સહિત 86 હજારની કરી છેતરપીંડી

આ ખોટી આશા અને વિશ્વાસનો લાભ લઈને આરોપીએ ફરિયાદી પાસેથી સોના-ચાંદીના દાગીના અને રૂ. 21,000 રોકડા મળીને કુલ રૂ. 86,000ની છેતરપિંડી (Fraud) કરી હતી. જ્યારે ફરિયાદીને આ બાબતે શંકા ગઈ ત્યારે સમગ્ર મામલાની જાણ સ્થાનિક પોલીસને કરવામાં આવી હતી. આ ગંભીર બનાવની ગંભીરતાને ધ્યાને લઈ ભાવનગર (Bhavnagar) લોકલ ક્રાઈમ બ્રાંચ (LCB) ની ટીમે તાત્કાલિક તપાસ હાથ ધરી હતી અને આરોપી માધુરીબેન પરમારની અટકાયત કરી કાયદેસરની કાર્યવાહી હાથ ધરી છે.

આ પણ વાંચોઃ Bhavnagar: સહકારી મંડળીઓને ઇન્કમ ટેક્સની 150 કરોડની નોટિસથી આક્રોશ