Bhavnagar News: ગારીયાધારમાં 24.59 લાખની ચોરીનો ભેદ ઉકેલાયો, દાગીના ભરેલી બેગ સેરવી લેનાર રિક્ષાચાલક ઝડપાયો

Bhavnagar ના ગારીયાધારમાં 24.59 લાખની ચોરીનો ભેદ ઉકેલાયો

પ્રાપ્ત વિગતો અનુસાર, ફરિયાદી કોમલબેન પાર્થભાઈ મૂળ સુરત ખાતે રહે છે અને તેઓ જન્માષ્ટમીના પવિત્ર તહેવારની ઉજવણી માટે પોતાના વતન ગારીયાધાર તાલુકાના નાની વાવડી ગામે આવ્યા હતા. વતન પહોંચવા માટે તેઓએ રિક્ષાનો સહારો લીધો હતો, પરંતુ જ્યારે તેઓ નાની વાવડી ગામે પોતાના ઘરે પહોંચ્યા ત્યારે તેમની સોના-ચાંદીના કિંમતી દાગીના અને રોકડ રકમથી ભરેલી બેગ રિક્ષામાંથી ગાયબ હોવાનું ધ્યાને આવ્યું હતું. આ બેગમાં કુલ રૂ. 24,59,730 નો મૂલ્યવાન મુદ્દામાલ હતો.

પોલીસે ગણતરીના કલાકમાં કેસ ઉકેલ્યો

ઘટનાની ગંભીરતાને ધ્યાને લઈને ગારીયાધાર પોલીસે તુરંત જ ચક્રો ગતિમાન કર્યા હતા અને રિક્ષા તથા રિક્ષાચાલક અંગે તપાસ શરૂ કરી હતી. પોલીસની ઝીણવટભરી તપાસમાં આ ગુનામાં નાની વાવડી ગામનો જ રહેવાસી રિક્ષા ચાલક કલ્પેશ નાનુભાઈ મકવાણા સંડોવાયેલો હોવાનું બહાર આવ્યું હતું. ગારીયાધાર પોલીસે તાત્કાલિક કાર્યવાહી કરીને આરોપી કલ્પેશ મકવાણાને ઝડપી પાડ્યો હતો અને તેની પાસેથી ચોરી કરાયેલો તમામ મુદ્દામાલ હેમખેમ રિકવર કરી લીધો હતો. પોલીસે આરોપી પાસેથી કુલ રૂ. 23,29,730 ના સોના-ચાંદીના ઘરેણાં, રૂ. 1,30,000 રોકડ રકમ અને ગુનામાં વપરાયેલી રૂ. 80,000 ની રિક્ષા સહિત કુલ રૂ. 25,39,730 નો મુદ્દામાલ કબજે કર્યો છે. પોલીસની આ ત્વરિત અને સઘન કામગીરીના કારણે ભોગ બનનાર પરિવારને લાખો રૂપિયાની માલિકીની મિલકત પરત મળી છે.

આ પણ વાંચો:  Vadodara Accident: વડોદરામાં અકસ્માતોની હારમાળા, છેલ્લા 48 કલાકમાં બેફામ વાહનોએ 4 નિર્દોષ લોકોના ભોગ લીધા