સ્માર્ટ બનશે અમદાવાદના નેતાઓ: ₹1.17 લાખની સહાયથી ખરીદાશે લેપટોપ-ગેજેટ્સ, કમિટીમાં પ્રસ્તાવ

લેપટોપ, પ્રિન્ટર અને મોબાઇલ માટે મળશે સહાય: ટેકનોલોજીકલ અપગ્રેડેશન

આ નવી દરખાસ્ત અનુસાર, કોર્પોરેટરો પોતાના વિસ્તારના પ્રશ્નો અને કચેરીના કામકાજ ડિજિટલ માધ્યમથી ઝડપથી ઉકેલી શકે તે હેતુથી આ સહાય મંજૂર કરવામાં આવી રહી છે. દરેક નવનિયુક્ત કોર્પોરેટરને લેપટોપ, પ્રિન્ટર અને નવો મોબાઈલ ફોન ખરીદવા માટે આ રકમ ફાળવવામાં આવશે. આ સુવિધા મળવાથી કોર્પોરેટરો સ્માર્ટ અને પેપરલેસ ગવર્નન્સ તરફ આગળ વધી શકશે. પોતાના વોર્ડની ફરિયાદો અને ઓનલાઈન કામગીરી માટે કોર્પોરેટરોએ હવે અન્ય કોઈ પર નિર્ભર રહેવું નહીં પડે અને લોકોના કામો પણ વધુ ઝડપી બનશે.

મોબાઈલ ભથ્થામાં 41 ટકાનો તોતિંગ વધારો: અધિકારીઓને પણ લોટરી લાગી

આ પ્રસ્તાવમાં માત્ર લેપટોપ કે પ્રિન્ટર જ નહીં, પરંતુ કોર્પોરેટરોના માસિક મોબાઈલ ભથ્થામાં પણ અધધધ 41 ટકાનો વધારો કરવાની દરખાસ્ત લાવવામાં આવી છે. નવા નિયમ મુજબ કોર્પોરેટરોનું મોબાઈલ ભથ્થું રૂપિયા 12 હજારથી વધારીને સીધું રૂપિયા 17 હજાર કરી દેવામાં આવશે. આ ઉપરાંત, કોર્પોરેશનના ઉચ્ચ અધિકારીઓના મોબાઈલ ભથ્થામાં પણ નોંધપાત્ર વધારો કરવામાં આવ્યો છે. પ્રજાના ટેક્સના પૈસાથી કોર્પોરેટરો અને અધિકારીઓ પર થઈ રહેલા આ આર્થિક મહેરબાનીના પ્રસ્તાવને લઈને હવે રાજકીય અને સામાજિક વર્તુળોમાં ચર્ચાઓએ જોર પકડ્યું છે.

આ પણ વાંચો: HNGUનો ઐતિહાસિક નિર્ણય: પાટણ-મહેસાણાની 17 કોલેજોનું જોડાણ રદ, નવા એડમિશન પર પ્રતિબંધ