Ahmedabad : ધંધુકા અને બગોદરા પંથકમાં જળબંબાકાર યથાવત, વરસાદ થંભી ગયાના દિવસો પછી ખેડૂતોની મુશ્કેલી યથાવત

બગોદરા આસપાસના ગામડાઓમાં જળબંબાકાર યથાવત

આશાસ્પદ પાક પાણીમાં ડૂબી જવાના કારણે અન્નદાતાઓની મહેનત પાણીમાં ગઈ છે અને આર્થિક નુકસાનનો સામનો કરવાનો વારો આવ્યો છે. ખેતરોમાંથી પાણી વહેલી તકે બહાર ન નીકળવાને કારણે આગામી સમયમાં રવી પાકની વાવણી પર પણ તેની માઠી અસર પડે તેવી પૂરી શક્યતા સેવાઈ રહી છે. બીજી તરફ, ગામડાઓની અંદર અને કાચા રસ્તાઓ પર ભરાયેલા પાણીના કારણે અવરજવર બંધ જેવી સ્થિતિ છે. પાણી ભરાઈ રહેવાને કારણે દૂષિત વાતાવરણ સર્જાયું છે અને મચ્છરોનો ઉપદ્રવ વધવાની સાથે ગંભીર રોગચાળો ફાટી નીકળવાની દહેશત પણ સ્થાનિક રહીશો સતાવી રહી છે.

ખેતરો બેટમાં ફેરવાતા ખેડૂતો ચિંતામાં

ગ્રામજનો દ્વારા અગાઉ અનેકવાર તંત્ર સમક્ષ રજૂઆતો કરવા છતાં પાણીના નિકાલ માટે કોઈ નક્કર અને ઝડપી કાર્યવાહી ન થવાને કારણે લોકોમાં વહીવટી તંત્ર અને સ્થાનિક સત્તાધીશો સામે ભારે રોષ જોવા મળી રહ્યો છે. અસરગ્રસ્ત ખેડૂતો અને ગ્રામજનોએ સરકાર તથા તંત્ર સમક્ષ ઉગ્ર માંગ કરી છે કે તાત્કાલિક ધોરણે મોટા પંપો અથવા અન્ય સાધનો લગાવીને ભરાયેલા પાણીનો નિકાલ કરવામાં આવે અને ખેતરોમાં થયેલા નુકસાનનો સર્વે કરીને યોગ્ય આર્થિક સહાય ચૂકવવામાં આવે, જેથી મુશ્કેલીમાં મુકાયેલા પરિવારોને રાહત મળી શકે.

આ પણ વાંચો : LIVE: Gujarat Latest News : વસો તાલુકાના અલીન્દ્રા ગામમાં વરસાદના કારણે પાણી ભરાયા