Gandhinagar : દહેગામ-નરોડા હાઇવે પર આવેલ રાયપુર કેનાલ બ્રિજ પરની પેરાપીટનો મોટો હિસ્સો ધરાશાયી

રાયપુર કેનાલ બ્રિજની પેરાપેટ તૂટી પડી

સ્થાનિક સૂત્રો પાસેથી મળતી માહિતી મુજબ, આ નર્મદા કેનાલ બ્રિજના સમારકામ માટે તંત્ર દ્વારા અગાઉ આશરે એક વર્ષ જેટલા લાંબા સમય સુધી બ્રિજ પરનો વાહનવ્યવહાર સંપૂર્ણપણે બંધ કરી દેવામાં આવ્યો હતો. આ એક વર્ષ દરમિયાન હજારો વાહનચાલકો અને સ્થાનિક નાગરિકોએ ભારે હાલાકી ભોગવવી પડી હતી અને લાંબા ડાયવર્ઝનનો સામનો કરવો પડ્યો હતો. જનતાએ એ આશાએ મુશ્કેલી વેઠી હતી કે પુલનું કામ મજબૂત થશે.

કોન્ટ્રાક્ટર સામે ગુનો નોંધવા સ્થાનિકોની માગ

માત્ર 4 મહિના પણ પૂરા ન થયા ત્યાં જ બ્રિજની સાઈડની પેરાપેટ દીવાલ ધરાશાયી થઈ ગઈ છે, જેને પગલે હાઇવે પરથી પસાર થતા વાહનોની સુરક્ષા સામે પણ મોટો ખતરો ઊભો થયો છે. જો આ દીવાલ તૂટી ત્યારે કોઈ વાહન તેની નજીક હોત તો મોટી જાનહાનિ થઈ શકી હોત. હવે જનતામાં એવો રોષ જોવા મળી રહ્યો છે કે કરોડો રૂપિયાના ટેક્સના પૈસાનું પાણી કરીને આખરે કેવું નબળું બાંધકામ કરવામાં આવ્યું?

શું સરકારી બાબુઓએ કમિશનના ચક્કરમાં કોન્ટ્રાક્ટરના હલકા મટીરિયલના વપરાશ સામે આંખ આડા કાન કર્યા હતા? આ ઘટના બાદ જવાબદાર એન્જિનિયરો અને કોન્ટ્રાક્ટર સામે કડક તપાસ કરી ફોજદારી ગુનો નોંધવામાં આવે તેવી માગ પ્રબળ બની છે.

આ પણ વાંચો : Narmada : ગરુડેશ્વરમાં મોટા ગજાના અધિકારીઓ પર બુલડોઝર એક્શન, 'શ્રી સરકાર' જમીન પર બનેલા પાકા મકાનો જમીનદોસ્ત કરાયા