Banaskantha Rain : પાલનપુરમાં માત્ર 8 મીમી વરસાદમાં જ હાઇવે બન્યું તળાવ, વાહનચાલકોના વાહનો પણ પાણીમાં બંધ પડયા!

પાણી ભરાતા સ્થાનિકોને હેરાન થવાનો વારો આવ્યો

બનાસકાંઠા જિલ્લામાં મોડી રાત્રે શરૂ થયેલા વરસાદે પાલનપુર અને વડગામ પંથકમાં મેઘમહેર વરસાવી છે. વડગામમાં 1 ઈંચ જેટલો વરસાદ નોંધાયો છે, જ્યારે જિલ્લા મથક પાલનપુરમાં 8 મીમી જેટલો સામાન્ય વરસાદ નોંધાયો છે.

જોકે, આ સામાન્ય વરસાદે જ સ્થાનિક વહીવટી તંત્રની પ્રી-મોન્સૂન કામગીરીની પોલ ખોલી નાખી છે. વરસાદના આગમન સાથે જ પાલનપુર અને આસપાસના અનેક વિસ્તારો પાણી-પાણી થઈ ગયા છે, જેના કારણે જનજીવન પર મોટી અસર પડી છે.

ગંભીર સ્થિતિ પાલનપુર-અંબાજી હાઇવે પર

8 મીમી જેટલા સામાન્ય વરસાદમાં પણ હાઇવે પર પાણી ભરાઈ જવાથી વાહનચાલકોને ભારે હાલાકીનો સામનો કરવો પડ્યો હતો. રસ્તા પર ભરાયેલા પાણીના કારણે ટ્રાફિક જામની સમસ્યા સર્જાઈ હતી અને વાહનચાલકો જીવના જોખમે પાણીમાંથી પસાર થવા મજબૂર બન્યા હતા.

તંત્ર દ્વારા દર વર્ષે ચોમાસા પહેલા લાખો રૂપિયાના ખર્ચે પ્રી-મોન્સૂન કામગીરીના દાવા કરવામાં આવે છે, પરંતુ વાસ્તવિકતા કંઈક અલગ જ જોવા મળી રહી છે. ડ્રેનેજ સિસ્ટમની યોગ્ય સફાઈના અભાવે પાણીનો નિકાલ ન થતા લોકોએ મુશ્કેલી ભોગવવી પડી રહી છે.

આ પણ વાંચો : Junagadh વોર્ડ નં.3 માં રાજકીય ગરમાવો, ગુજસીટોક કેસમાં ભાજપના કોર્પોરેટર જેલભેગા થતા યોજાશે પેટા ચૂંટણી