Chhota Udepur ના બોડેલીમાં દીપડાનો આતંક, ઘર આંગણે રમી રહેલી 4 વર્ષની માસૂમ બાળકીનો ભોગ લીધો

દીપડાના આ અચાનક અને ઘાતક હુમલાને કારણે બાળકીને ગંભીર ઇજાઓ પહોંચી હતી. પરિવારજનો અને આસપાસના લોકો તાત્કાલિક દોડી આવ્યા હતા અને દીપડાને ભગાડવાનો પ્રયાસ કર્યો હતો, પરંતુ તીવ્ર ઇજાઓના કારણે માસૂમ બાળકીની હાલત નાજુક થઈ ગઈ હતી.

તબીબે બાળકીને મૃત જાહેર કરી

પરિવારજનો તાત્કાલિક ધોરણે બાળકીને સારવાર માટે જાંબુઘોડાના સામૂહિક આરોગ્ય કેન્દ્ર ખાતે લઈને પહોંચ્યા હતા, પરંતુ ફરજ પરના તબીબોએ તપાસીને ભવ્યાબેનને મૃત જાહેર કરી હતી. ઘરનું આંગણું સૂનું કરી દેતી આ ઘટનાથી મૃતક બાળકીના પરિવારમાં આક્રંદ મચી ગયો છે અને માતા-પિતાનું રોકકળ જોઈને આખું ગામ હચમચી ગયું છે.

વન વિભાગ દ્વારા દીપડાને પકડવા પાંજરા ગોઠવાયા

ઘટનાની જાણ થતાં જ વન વિભાગની ટીમ અને સ્થાનિક પોલીસ કાફલો ત્વરિત ઘટનાસ્થળે દોડી આવ્યો હતો. પરિસ્થિતિની ગંભીરતાને જોતા વન વિભાગ દ્વારા નરાધમ દીપડાને ઝડપી પાડવા માટે જુદી જુદી જગ્યાએ પાંજરા ગોઠવવાની કવાયત હાથ ધરવામાં આવી છે.

સ્થાનિક ગ્રામજનો અને આગેવાનોમાં વન વિભાગની કામગીરી સામે રોષ જોવા મળી રહ્યો છે અને તેમની માંગ છે કે નરભક્ષી દીપડાને વહેલી તકે પકડીને પાંજરે પૂરવામાં આવે જેથી અન્ય નિર્દોષનો ભોગ ન લેવાય. વન વિભાગ દ્વારા સતત પેટ્રોલિંગ વધારીને દીપડાને પકડવાના પ્રયાસો સઘન બનાવવામાં આવ્યા છે.

આ પણ વાંચો : Narmada ના સાગબારામાં જંગલની જમીન ખેડાણ મુદ્દે જંગ, વન વિભાગ અને ખેડૂતો આમને-સામને આવતા તણાવપૂર્ણ સ્થિતિ