વરસાદના સત્તાવાર આંકડાઓ પર નજર કરીએ તો, પાવીજેતપુર તાલુકામાં સૌથી વધુ 3 ઇંચ, ક્વાંટમાં અઢી ઇંચ, નસવાડીમાં 2 ઇંચ અને કદવાલમાં 2 ઇંચ કરતા વધુ વરસાદ નોંધાયો છે.
હિરણ નદીમાં ભારે ઘોડાપૂર આવ્યું
આ અતિભારે વરસાદના પગલે છોટા ઉદેપુર જિલ્લાની બીજી સૌથી મોટી હિરણ નદીમાં ભારે ઘોડાપૂર આવ્યું છે. નદી બે કાંઠે વહેતી થવાને કારણે રાજવાસણા રબર ડેમ ઓવરફ્લો થઈને છલકાઈ ગયો છે.
ડેમના ઉપરથી પાણી વહેવા લાગતા આખો નજારો કોઈ દરિયા કિનારા જેવો ભવ્ય અને રમણીય બની ગયો છે, જેને નિહાળવા માટે સ્થાનિક લોકોમાં ભારે ઉત્સાહ જોવા મળ્યો છે અને લાંબા સમયની રાહ જોયા બાદ નદીઓમાં નવા નીર આવવાથી ખેડૂતોમાં આનંદની લાગણી પ્રસરી ગઈ છે.
જોખમી જગ્યાએ સેલ્ફી ના લેવા તંત્રની અપીલ
બીજી બાજુ, ભારે વરસાદની ચેતવણીને પગલે જિલ્લાનું વહીવટી તંત્ર અને પોલીસ વિભાગ સંપૂર્ણપણે સજ્જ થઈ ગયા છે. સંભવિત આપત્તિઓને પહોંચી વળવા માટે NDRF અને SDRFની ટીમો સાથે સતત સંકલન સાધીને પોલીસ તંત્ર તમામ કામગીરી માટે તૈયાર છે.
વહીવટી તંત્ર દ્વારા નાગરિકો અને પ્રવાસીઓને ખાસ અપીલ કરવામાં આવી છે કે તેઓ પાણી ભરાયેલા કોઝવે કે જોખમી જગ્યાઓ પર સેલ્ફી લેવાનું ટાળે. ભારે વરસાદ દરમિયાન સરકાર અને તંત્રની સત્તાવાર સૂચનાઓનું ચુસ્તપણે પાલન કરવા તેમજ સોશિયલ મીડિયા પર ફેલાતી અફવાઓથી દૂર રહેવા પણ ભારપૂર્વક જણાવાયું છે.
આ પણ વાંચો : Kheda Rain : ખેડા જિલ્લામાં મેઘરાજાનું ધમાકેદાર આગમન, યાત્રાધામ ડાકોરથી મહેમદાવાદ સુધી મુશળધાર વરસાદ
