Ahmedabad: ગ્લાસગોથી પરત ફર્યા નાયબ મુખ્યમંત્રી હર્ષભાઈ સંઘવી, અમદાવાદ એરપોર્ટ પર ભવ્ય સ્વાગત

2030ની યજમાની માટે સત્તાવાર ધ્વજ સ્વીકાર્યો

ગ્લાસગોમાં યોજાયેલા સમાપન સમારોહ દરમિયાન નાયબ મુખ્યમંત્રી હર્ષભાઈ સંઘવીએ અમદાવાદ અને ભારત તરફથી કોમનવેલ્થ ગેમ્સ 2030 ની યજમાની માટે સત્તાવાર ધ્વજ સ્વીકાર્યો હતો. આ સાથે બેટન પણ ભારતને સોંપવામાં આવ્યું હતું. આ ક્ષણ ગુજરાત માટે ગૌરવની સાથે દેશ માટે પણ ઐતિહાસિક માનવામાં આવી રહી છે.

એરપોર્ટ પર ઉમટી પડ્યા સમર્થકો

અમદાવાદ એરપોર્ટ પર હર્ષભાઈ સંઘવીના આગમનની જાણ થતાં જ મોટી સંખ્યામાં ભાજપ કાર્યકરો, યુવાનો અને સમર્થકો ઉપસ્થિત રહ્યા હતા.    તેમનું સ્વાગત કરવામાં આવ્યું હતું. એરપોર્ટ પર ઉત્સાહભર્યો માહોલ જોવા મળ્યો હતો.

ગ્લાસગોમાં ભારતનું પ્રતિનિધિત્વ

નાયબ મુખ્યમંત્રી હર્ષભાઈ સંઘવી ગ્લાસગો પ્રવાસ દરમિયાન ભારતના પ્રતિનિધિ તરીકે વિવિધ કાર્યક્રમોમાં ઉપસ્થિત રહ્યા હતા. સમાપન સમારોહમાં વિશ્વભરના પ્રતિનિધિઓની હાજરી વચ્ચે અમદાવાદને મળેલી 2030ની યજમાનીને આંતરરાષ્ટ્રીય સ્તરે મહત્વપૂર્ણ સિદ્ધિ તરીકે જોવામાં આવી રહી છે.

અમદાવાદ માટે રમતગમત ક્ષેત્રે મોટી તક

કોમનવેલ્થ ગેમ્સ 2030ની યજમાની મળવાથી અમદાવાદમાં રમતગમતના આધુનિક માળખાં, આંતરરાષ્ટ્રીય સ્તરની સુવિધાઓ અને વૈશ્વિક રોકાણ માટે નવા દ્વાર ખુલવાની શક્યતા વ્યક્ત કરવામાં આવી રહી છે. રાજ્ય સરકાર માટે પણ આ આયોજન રમતગમત, પર્યટન અને શહેરી વિકાસને ગતિ આપનાર મહત્વપૂર્ણ અવસર બની શકે છે.

આ પણ વાંચોઃ Delhi માં PM મોદીને મળ્યા મંત્રી અર્જુનભાઈ મોઢવાડિયા, પોરબંદરમાં રૂ.27,500 કરોડના ખર્ચે મેગાશિપ યાર્ડને આપી મંજૂરી