હર્ષભાઈ સંઘવી અસરગ્રસ્ત વિસ્તારોની મુલાકાતે

સ્થિતિની ગંભીરતાને જોતા ગુજરાતના ગૃહમંત્રી હર્ષભાઈ સંઘવી (Harsh Sanghavi) તાત્કાલિક અસરગ્રસ્ત વિસ્તારોની મુલાકાતે પહોંચ્યા હતા. તેમણે વરાછા સ્થિત પોદાર આર્કેડની મુલાકાત લઈને સ્થળ પરની સ્થિતિનો જાતતપાસ કર્યો હતો. અતિવૃષ્ટિને કારણે પોદાર આર્કેડની દુકાનોમાં પાણી ઘૂસી જતાં મોબાઈલ અને અન્ય ઈલેક્ટ્રોનિક સામાનને ભારે નુકસાન થયું છે, જેના કારણે વેપારીઓને કરોડો રૂપિયાનું આર્થિક નુકસાન થયું હોવાનો અંદાજ છે.

અસરગ્રસ્ત વેપારીઓ સાથે સીધી વાતચીત કરી

મુલાકાત દરમિયાન હર્ષભાઈ સંઘવીએ અસરગ્રસ્ત વેપારીઓ સાથે સીધી વાતચીત કરી હતી અને તેમને પડેલી મુશ્કેલીઓ જાણી હતી. વેપારીઓએ તેમની દુકાનોમાં થયેલા નુકસાન અંગે મંત્રીને વિગતવાર માહિતી આપી હતી. ગૃહમંત્રીએ વેપારીઓને સાંત્વના પાઠવતા ખાતરી આપી હતી કે સરકાર દ્વારા થયેલા નુકસાનનો તાગ મેળવવામાં આવી રહ્યો છે. પોદાર આર્કેડ એ સુરતનું મોબાઈલ માર્કેટિંગનું મોટું કેન્દ્ર છે, તેથી અહીંના વેપારીઓની સ્થિતિને ધ્યાનમાં રાખીને વહીવટીતંત્ર યોગ્ય પગલાં લેશે તેમ મનાઈ રહ્યું છે.

Surat Flood Damage:  પાણીના નિકાલની કામગીરી યુદ્ધના ધોરણે

સુરત મહાનગરપાલિકા (Surat Municipal Corporation) દ્વારા પણ પાણીના નિકાલની કામગીરી યુદ્ધના ધોરણે હાથ ધરવામાં આવી હતી, પરંતુ વેપારીઓ માટે આ નુકસાન ભરપાઈ કરવું મોટો પડકાર છે. ગૃહમંત્રીની આ મુલાકાતથી વેપારીઓમાં થોડી આશા જાગી છે કે સરકારી સહાય અથવા રાહત પેકેજ બાબતે યોગ્ય નિર્ણય લેવાશે. આગામી સમયમાં વહીવટીતંત્ર દ્વારા નુકસાનીનો સર્વે કરીને રિપોર્ટ તૈયાર કરવામાં આવશે, જેના આધારે આગળની કાર્યવાહી હાથ ધરાશે.

આ પણ વાંચો: Ship Accident: સલાયાનું જહાજ ઓમાનના દરિયામાં ડૂબ્યું, 2ના મોત અને 12નો સફળ બચાવ