International Yoga Day 2026 news: આગામી 21 જૂનના રોજ સમગ્ર વિશ્વની સાથે ગુજરાતમાં પણ 12મા આંતરરાષ્ટ્રીય યોગ દિવસની ઉત્સાહભેર ઉજવણી કરવામાં આવશે. આ વર્ષે 'યોગ ફોર હેલ્ધી એજિંગ' (Yoga for Healthy Aging) ની વિશેષ થીમ પર આધારિત આ કાર્યક્રમને સફળ બનાવવા માટે રાજ્ય સરકાર દ્વારા વ્યાપક આયોજન કરવામાં આવ્યું છે. ગાંધીનગર ખાતે આયોજિત પત્રકાર પરિષદમાં નાયબ મુખ્યમંત્રી હર્ષભાઈ સંઘવીએ આ અંગે માહિતી આપી હતી.
માણસામાં રાજ્યકક્ષાનો મુખ્ય કાર્યક્રમ
12 મા આંતરરાષ્ટ્રીય યોગ દિવસની ઉજવણી અંગે વિગતો આપતાં નાયબ મુખ્યમંત્રી હર્ષભાઈ સંઘવીએ જણાવ્યું હતું કે, સમગ્ર દેશમાં વડાપ્રધાન શ્રી નરેન્દ્રભાઈ મોદીના સુશાસનના 12 વર્ષની ઉજવણી વિશિષ્ટ સેવાકીય કાર્યો દ્વારા કરવામાં આવી રહી છે. આ અંતર્ગત ગુજરાતમાં આ વર્ષે 12 મા આંતરરાષ્ટ્રીય યોગ દિવસની ઉત્સાહભેર ઉજવણી કરવામાં આવશે. મુખ્યમંત્રી ભૂપેન્દ્રભાઈ પટેલની અધ્યક્ષતામાં યોગ દિવસની રાજ્યકક્ષાની ઉજવણી ગાંધીનગર જિલ્લાના માણસા તાલુકામાં કરવામાં આવશે. જેમાં 4 હજારથી વધુ નાગરીકો સહભાગી થશે.આ ઉપરાંત, કેન્દ્રીય ગૃહમંત્રી અમિત શાહ અમદાવાદ ખાતે આયોજિત યોગ દિવસના કાર્યક્રમમાં વિશેષ ઉપસ્થિત રહીને યોગાભ્યાસમાં જોડાશે.
રાજ્યભરમાં 24 હજારથી વધુ સ્થળોએ યોગની ગુંજ
નાયબ મુખ્યમંત્રીએ જણાવ્યું હતું કે, આ વર્ષે 'યોગા ફોર હેલ્ધી એજિંગ' થીમ પર વિશેષ કાર્યક્રમો યોજાશે. આ સંદર્ભે રાજ્યમાં અત્યાર સુધીમાં 10 થી વધુ મોટા કાર્યક્રમોનું સફળ આયોજન થઈ ચૂક્યું છે. આગામી યોગ દિવસ સુધીમાં સમગ્ર રાજ્યમાં શાળાઓ, કોલેજો, કોર્પોરેટ ઓફિસો, ઇન્ડસ્ટ્રીઝ, બગીચાઓ અને જાહેર માર્ગો પર મળીને કુલ 24,000 જેટલા કાર્યક્રમોનું આયોજન કરવામાં આવ્યું છે.
1.25 કરોડથી વધુ લોકોનું રજીસ્ટ્રેશન
હર્ષભાઈ સંઘવીએ માહિતી આપતા ઉમેર્યું કે, આ વર્ષે યોગ દિવસે સમગ્ર રાજ્યમાંથી 1.25 કરોડથી પણ વધુ નાગરિકો યોગ પ્રોટોકોલ તાલીમમાં ભાગ લેવાના છે. તમામ જિલ્લાઓમાં કલેક્ટરો, મ્યુનિસિપલ કમિશનરો અને સામાજિક સંસ્થાઓના સંકલન સાથે વિવિધ સમિતિઓ આ આયોજનને સફળ બનાવવા કાર્યરત છે.
એક જ સમયે સામૂહિક યોગાભ્યાસ યોજાશે
તેમણે ઉમેર્યું હતું કે, રાજ્યમાં 14 જૂનથી 20 જૂન સુધી 'યોગ સપ્તાહ'ની ઉજવણી કરવામાં આવી રહી છે. સફાઈ કર્મચારીઓ, મહિલાઓ, સિનિયર સિટીઝન્સ અને ખેડૂતો જેવા સમાજના વિવિધ વર્ગો આવરી લઈને 12 જેટલા વિશેષ કાર્યક્રમો યોજાઇ રહ્યાં છે. જેમાંથી 10 કાર્યક્રમો સંપન્ન થઈ ચૂક્યા છે અને બાકીના 2 કાર્યક્રમો આગામી બે દિવસમાં યોજાશે. આ ઉપરાંત, 17 મહાનગરપાલિકાઓ, 33 જિલ્લાઓના તમામ તાલુકાઓ, નગરપાલિકાઓ અને ગ્રામ્ય સ્તરે એક જ સમયે સામૂહિક યોગાભ્યાસ યોજાશે. આ અનુસંધાને આજે વહેલી સવારે ગાંધીનગર સ્થિત ગિફ્ટ સિટી ખાતે 5,000 થી વધુ સભ્યોએ ઉત્સાહપૂર્વક જોડાઈને સામૂહિક યોગ કર્યા હતા.
પીએમ મોદીની વિદેશ મુલાકાત અંગે હર્ષભાઈ સંઘવીએ શું કહ્યું ?
નાયબ મુખ્યમંત્રી એ વડાપ્રધાન નરેન્દ્રભાઈ મોદીની વિદેશ મુલાકાતને યાદ કરતા જણાવ્યું હતું કે, વિદેશની ધરતી પર વિદેશી નાગરિકો દ્વારા યોગ થકી તેમનું સ્વાગત કરવામાં આવ્યું હતું, જે દર્શાવે છે કે આપણી સંસ્કૃતિ અને યોગ આજે દુનિયાના ખૂણે-ખૂણે પહોંચી ગયા છે. ભારતમાં જ નહીં પરંતુ વિશ્વમાં આજે ખૂબ જ આકર્ષક પગાર સાથે ભારતીય યોગ શિક્ષકોની માંગમાં વધારો થયો છે.
ગુજરાત યોગ બોર્ડની ટીમને અભિનંદન પાઠવ્યા
ગુજરાત યોગ બોર્ડ દ્વારા સામાન્ય નાગરિકો રોજ સવારે યોગ કરી શકે તે માટે ટ્રેનિંગ અને સુવિધાઓ પૂરી પાડવામાં આવી રહી છે. નાયબ મુખ્યમંત્રીએ આ સરાહનીય કામગીરી બદલ યોગ બોર્ડના ચેરમેન અને તેમની સમગ્ર ટીમને અભિનંદન પાઠવ્યા હતા.
યોગ ટીચર્સની વધતી માંગ
નાયબ મુખ્યમંત્રી હર્ષભાઈ સંઘવીએ વધુમાં ઉમેર્યું હતું કે, આજે વિશ્વભરમાં યોગનું મહત્વ વધ્યું છે, જેના કારણે યોગ ટીચર્સની માંગમાં પણ અભૂતપૂર્વ વધારો થયો છે. તેમણે યુવાનોને યોગ ક્ષેત્રે કારકિર્દી બનાવવા માટે પ્રોત્સાહિત કરતા જણાવ્યું હતું કે, આ ક્ષેત્રે રોજગારીની ઉત્તમ તકો રહેલી છે.
આમ, ગુજરાત સરકારના આયોજન હેઠળ 21 જૂને સમગ્ર રાજ્ય 'યોગમય' બનશે અને લાખો નાગરિકો એકસાથે યોગ પ્રોટોકોલ અનુસરીને સ્વસ્થ જીવનનો સંકલ્પ લેશે.
આ પણ વાંચો:International Yoga Day 2026: કોલકાતામાં PM Modi ના નેતૃત્વમાં યોજાશે યોગ દિવસ, જાણો આ વર્ષની ખાસ થીમ અને સમગ્ર કાર્યક્રમ
