ગાંધીનગરના અડાલજ-ઝુંડાલ નજીક નર્મદા કેનાલમાં પાંચ મિત્રો તરવાની સ્પર્ધા માટે ગયા હતા, જે દુર્ઘટનામાં ફેરવાઈ ગઈ. એક યુવકને ડૂબતો જોઈ તેને બચાવવા ગયેલા અન્ય ચાર મિત્રો પણ પ્રવાહમાં સપડાયા હતા. આ દુર્ઘટનામાં બે મિત્રોના મૃતદેહ મળી આવ્યા છે, જ્યારે એકની શોધખોળ ફાયર બ્રિગેડ દ્વારા ચાલુ છે.
Gandhinagar Canal Incident: ગાંધીનગરના અડાલજ-ઝુંડાલ (Adalaj-Zundal) વિસ્તારમાંથી પસાર થતી નર્મદા કેનાલ (Narmada Canal) આજે પાંચ મિત્રો માટે કાળમુખી સાબિત થઈ છે. પ્રાપ્ત માહિતી અનુસાર, પાંચ મિત્રોનો એક ગ્રુપ નર્મદા કેનાલ કિનારે પહોંચ્યો હતો. દરમિયાન, તરવાની સ્પર્ધા કરવાના ઇરાદે એક યુવકે કેનાલમાં છલાંગ લગાવી હતી. જોકે, કેનાલના ઊંડા અને ધસમસતા પાણીમાં તે ડૂબવા લાગ્યો, તેને બચાવવા માટે અન્ય ચાર મિત્રો પણ એક પછી એક કેનાલમાં કૂદ્યા હતા.
ફાયર બ્રિગેડ દ્વારા મૃતદેહોની શોધખોળ
પાણીના ભારે પ્રવાહમાં પાંચેય મિત્રો લાચાર બની ગયા હતા. સદનસીબે બે મિત્રોએ હિંમત દાખવીને કિનારે પહોંચવામાં સફળતા મેળવી હતી, પરંતુ હર્ષ પ્રજાપતિ, કૌશિક ઠાકોર અને અર્પિત પટેલ પ્રવાહમાં ગરકાવ થઈ ગયા હતા. ઘટનાની જાણ થતાં જ અડાલજ પોલીસ અને ફાયર બ્રિગેડની ટીમ ઘટનાસ્થળે દોડી આવી હતી. વ્યાપક શોધખોળ બાદ હર્ષ પ્રજાપતિનો મૃતદેહ જમીયતપુરા કેનાલમાંથી અને કૌશિક ઠાકોરનો મૃતદેહ ખોરજ કેનાલમાંથી મળી આવ્યો છે. અર્પિત પટેલની શોધખોળ હજુ પણ ફાયર બ્રિગેડ દ્વારા ચાલુ રાખવામાં આવી છે. અડાલજ પોલીસે અકસ્માતે મોતનો ગુનો નોંધી સમગ્ર મામલે તપાસ હાથ ધરી છે.
Gandhinagar: અડાલજ કેનાલ હોનારત મામલે પોલીસનો ખુલાસો
અડાલજ કેનાલમાં યુવાનોના ડૂબી જવાની દુખદ ઘટના અંગે તપાસ કરી રહેલા અડાલજ પોલીસ મથકના પીઆઈ (PI) એસ.જી. દેસાઈએ મહત્વની વિગતો આપી છે.તેમણે જણાવ્યું હતું કે, "પ્રાથમિક તપાસમાં સામે આવ્યું છે કે યુવાનો પાર્ટી કરીને પરત ફરી રહ્યા હતા. આ દરમિયાન તરતા આવડવાના અતિવિશ્વાસમાં તેઓ કેનાલના ઊંડા પાણીમાં ઉતરી પડ્યા હતા, જે તેમના માટે જીવલેણ સાબિત થયું." હાલમાં પરિવારો ગંભીર આઘાતમાં હોવાથી પોલીસની વધુ પૂછપરછ બાકી છે. પોલીસે આ મામલે અકસ્માતે મોતનો ગુનો નોંધીને કાયદેસરની કાર્યવાહી શરૂ કરી છે.તંત્ર દ્વારા નાગરિકો, ખાસ કરીને યુવાનોને ખાસ અપીલ કરવામાં આવી છે કે કેનાલના ધસમસતા પ્રવાહ અને ઊંડા પાણીમાં ન્હાવાનું કે કોઈપણ પ્રકારનું જોખમી સાહસ ન કરવું. એક પળની બેદરકારી અને અતિવિશ્વાસ જીવલેણ બની શકે છે.
આ પણ વાંચો: Surat: પાંડેસરામાં રોડનું ધોવાણ જીવલેણ, રસ્તા પર પડેલા ખાડામાં ખાબક્યો આઇશર ટેમ્પો
