Gandhinagar : કોસ્ટ ગાર્ડમાં ફરજ બજાવતા જવાને રાઈફલથી પોતાની જાત પર ચલાવી ગોળી, ઈજાગ્રસ્તને તાત્કાલિક સારવાર હેઠળ ખસેડાયા

જવાનની સ્થિતિ અત્યંત ગંભીર છે

ઘટનાની જાણ થતા પોલીસનો સ્ટાફ સ્થળ પર પહોંચ્યો હતો અને ઈજાગ્રસ્તને વધુ સારવાર માટે અમદાવાદ ખસેડવામાં આવ્યા છે. જવાનની સ્થિતિ અત્યંત ગંભીર હોવાની વાત સામે આવી છે.

સૂત્રો પાસેથી મળતી વિગતો અનુસાર આત્મહત્યાનો પ્રયાસ કરનાર જવાનની ઓળખ 43 વર્ષીય હસમુખભાઈ ચતુરભાઈ પ્રજાપતિ તરીકે થઈ છે, જેઓ ગાંધીનગર નજીક આવેલા લેકાવાડા ગામના વતની છે. હસમુખભાઈ સેક્ટર-1 ગાયત્રી મંદિર પાસે આવેલી કોસ્ટ ગાર્ડની ઓફિસ ખાતે સુરક્ષા વ્યવસ્થામાં તહેનાત હતા. રવિવારે સવારે તેઓ પોતાની ફરજ પર હાજર હતા, તે દરમિયાન આ ઘટના ઘટી છે.

પોલીસે ઈજાગ્રસ્ત જવાનના સાથી કર્મચારીઓની પૂછપરછ શરૂ કરી

સમગ્ર ઘટનામાં સેકટર 7 પોલીસે ગુનો નોંધી તપાસ શરૂ કરી છે. સાથે આ ઘટના બનતા પોલીસે અન્ય સાથી કર્મીઓની પૂછપરછ શરૂ કરી છે, તો કામના ભારણને લઈ કે અન્ય કોઈ કારણોસર આ ઘટના બની છે તેને લઈ તપાસનો ધમધમાટ શરૂ છે. આત્મહત્યા કરવાનો પ્રયાસ હતો કે આકસ્મિક ગોળી છૂટી છે તે તો તપાસ બાદ જ સામે આવશે.

આ પણ વાંચો : Bhavnagar : ખનીજ માફિયાઓ પર તંત્રની મોટી તવાઈ, ઘોઘાના લાખણકા ગામે અડધી રાત્રે દરોડા પાડી લાખોનો મુદ્દામાલ જપ્ત કરાયો