Gir Somnath : આ શિક્ષક શાળામાં અભ્યાસ કરતા નાના બાળકો પાસે દારૂ મંગાવતો હોવાનું બહાર આવ્યું છે. શાળામાં લગાવેલ સીસીટીવી કેમેરામાં આ આખી ઘટના કેદ થઈ હતી. ફૂટેજમાં સ્પષ્ટ જોઈ શકાય છે કે કઈ રીતે શિક્ષક બાળકોનો દુરુપયોગ કરી તેમને નશીલા પદાર્થો કે દારૂ લાવવા માટે મજબૂર કરી રહ્યો છે.
શિક્ષણ જગતને કલંકિત કરતો કિસ્સો
જ્યારે શાળાના પ્રિન્સિપાલે આ વીડિયો જોયો, ત્યારે તેઓ પણ સ્તબ્ધ થઈ ગયા હતા. શાળાના ગરિમાને જાળવી રાખવા અને બાળકોના ભાવિની રક્ષા માટે પ્રિન્સિપાલે તાત્કાલિક અસરથી આ શિક્ષક વિરુદ્ધ લેખિત ફરિયાદ નોંધાવી છે.
સૂત્રો પાસેથી મળતી માહિતી મુજબ આ હરેશ ગોસ્વામી નામનો શિક્ષક અગાઉ પણ શાળાએ નશાની હાલતમાં આવતો હોવાની ચર્ચાઓ વારંવાર થતી હતી. જે સ્થળે બાળકો અક્ષરજ્ઞાન અને સંસ્કાર મેળવવા માટે આવતા હોય, તે પવિત્ર શાળામાં શિક્ષકનું આવું વર્તન બાળકોના ભાવિ સાથે ગંભીર ચેડાં સમાન છે.
શિક્ષક સામે કાયદાકીય માગ
આ ઘટના સામે આવતા જ વાલીઓમાં ભારે રોષની લાગણી ફેલાઈ ગઈ છે. વાલીઓ હવે આ શિક્ષક સામે કડકમાં કડક પગલાં ભરવાની માગ કરી રહ્યા છે. એક શિક્ષક દ્વારા જ બાળકોના હાથમાં દારૂની બોટલ પકડાવવી એ રાજ્યના શિક્ષણ વિભાગ માટે પણ લાલબત્તી સમાન છે. હવે શિક્ષણ વિભાગ આ મામલે કેવા પગલાં ભરે છે અને આવા તત્વોને શાળામાંથી કાયમી ધોરણે દૂર કરવામાં આવે છે કે કેમ, તે જોવું રહ્યું.
આચાર્યએ મીડિયા સમક્ષ શિક્ષકની પોલ ખોલી
ગીર સોમનાથના ખાપટ ગામની શાળામાં વિદ્યાર્થીને દારૂ લેવા મોકલવાનો ગંભીર મામલો સામે આવ્યો છે. શાળાના આચાર્યએ મીડિયા સમક્ષ શિક્ષક હરેશગિરી ગૌસ્વામીની પોલ ખોલતા આ સમગ્ર ઘટના પ્રકાશમાં આવી છે.વિદ્યાર્થીની પૂછપરછ દરમિયાન જાણવા મળ્યું હતું કે, શિક્ષક હરેશગિરી ગૌસ્વામીએ તેને દારૂ લેવા માટે મોકલ્યો હતો. આ શિક્ષક સામે અગાઉ પણ ફરિયાદો નોંધાઈ ચૂકી છે, જેના પગલે જિલ્લા કક્ષાએ સુનાવણી કરી તેમની પાસેથી બાંહેધરી પત્ર પણ લેવામાં આવ્યો હતો. આ સમગ્ર મામલે આચાર્ય દ્વારા શિક્ષક વિરુદ્ધ પોલીસ ફરિયાદ નોંધાવવામાં આવી છે અને હાલ શિક્ષક સામે કડક કાર્યવાહીની માંગ ઉઠી છે.
આ પણ વાંચો : Surat : પરવત પાટિયાથી ડિમ્પલ નગર સુધી નાયબ મુખ્યમંત્રીની મધરાત્રે મુલાકાત, તંત્રને આપ્યા તાત્કાલિક કામગીરીના આદેશ
