Ankleshwar: અંતિમયાત્રા કાદવ-કીચડમાંથી કાઢવાની નોબત, સ્થાનિક મહિલાઓનો પાલિકા પ્રમુખને ખુલ્લો પડકાર

શું છે લોકોની સમસ્યા?

સુરતી ભાગોળ વિસ્તારમાં છેલ્લા ઘણા સમયથી રસ્તાઓ પર કાદવ અને ગંદા પાણીનો ભરાવો કાયમી સમસ્યા બની ગયો છે. સામાન્ય દિવસોમાં પણ અહીંથી પસાર થવું મુશ્કેલ હોય છે, ત્યારે તાજેતરમાં એક પરિવારની અંતિમયાત્રા આ કીચડમાંથી જ પસાર કરવી પડી હતી. મરણ પામેલ વ્યક્તિની નનામી પણ ગંદા પાણીમાં પગ મૂકીને લઈ જવી પડી તે દ્રશ્ય જોઈને સ્થાનિકોનો ગુસ્સો ફાટી નીકળ્યો હતો.

પાલિકા સામે મહિલાઓનો ભારે આક્રોશ

વારંવારની રજૂઆતો છતાં નગરપાલિકા દ્વારા કોઈ જ કાર્યવાહી ન કરવામાં આવતા વિસ્તારની મહિલાઓએ ખુલ્લેઆમ રોષ ઠાલવ્યો છે. મહિલાઓએ આક્ષેપ કર્યો છે કે, "ચૂંટણી સમયે મત લેવા આવતા નેતાઓ અત્યારે દેખાતા નથી. અમારી સમસ્યાઓ ઉકેલવામાં પાલિકા તદ્દન નિષ્ફળ રહી છે." એટલું જ નહીં, રોષે ભરાયેલી મહિલાઓએ અંકલેશ્વર નગરપાલિકાના પ્રમુખને સીધી ચીમકી આપતા કહ્યું છે કે, "અમે જો ગુસ્સે ભરાશું તો પ્રમુખને ભાગવાનો વારો આવશે!"

સ્થાનિકોની માંગ છે કે સત્વરે આ સમસ્યાનો કાયમી ઉકેલ લાવવામાં આવે, અન્યથા પાલિકા કચેરીનો ઘેરાવ કરી ઉગ્ર આંદોલન કરવામાં આવશે.

આ પણ વાંચો: Surat: આત્મીય વિલા સોસાયટીમાં દીવાલ ધરાશાયી થતા અનેક વાહનો ખાડીમાં ગરકાવ