અંબા વિજય હોસ્પિટલના પ્લોટમાં ગરબી આયોજનથી જામનગરમાં રાજકીય ગરમાવો
જામનગર શહેરમાં અંબા વિજય હોસ્પિટલ માટેના ખુલ્લા પ્લોટમાં આ વર્ષે નવરાત્રિ દરમિયાન ભવ્ય ગરબી યોજવાની તૈયારીઓ શરૂ કરવામાં આવી હતી. જોકે, આ આયોજન સામે સ્થાનિક રહીશો ઉપરાંત શહેર ભાજપ પ્રમુખ સહિતના અગ્રણીઓએ મોરચો માંડ્યો હતો. વિરોધ પક્ષે કલેક્ટર અને જિલ્લા પોલીસ વડા (SP) ને આવેદનપત્ર સુપરત કરીને ટ્રાફિક સમસ્યા તેમજ સ્થાનિક અડચણોનું કારણ આગળ ધરી આ ગરબી રદ કરવાની ઉગ્ર માંગ કરી હતી.
આ વિવાદ સતત વકરતાં આખરે જમીનની મંજૂરી આપનાર જામનગરના મહારાજા જામસાહેબ શત્રુશલ્યસિંહજીએ તારીખ 29/09/2026 ના રોજ સત્તાવાર લેખિત પત્ર જાહેર કરી સમગ્ર સ્થિતિ પર પોતાનું વલણ સ્પષ્ટ કર્યું છે.
'બંધ કરાવો તો શહેરની બધી ગરબીઓ બંધ કરાવો'
જામસાહેબે પોતાના પત્રમાં આંદોલનકારીઓની રજૂઆત સામે તાર્કિક સવાલો ઉઠાવ્યા છે. તેમણે જણાવ્યું હતું કે, આંદોલન કરવાવાળાઓની રજૂઆત સત્ય હશે, પરંતુ એ બધી હકીકતો ગામમાં સો જેટલી જગ્યાઓ પર પણ લાગુ પડે છે જ્યાં વર્ષોથી ગરબીઓ રમાય છે.
જો અહીં અડચણ કે તકલીફ થતી હોય તો તે તમામ સ્થળોએ પણ થતી જ હોય, માટે જો બંધ કરાવવી હોય તો આખા ગામમાં બધે ઠેકાણે ગરબીઓ બંધ થવી જોઈએ; માત્ર અહીંયા જ શું કામ? બંધ કરાવો તો બધી કરાવો.
જામસાહેબની કડક સૂચનાઓ
જામસાહેબે પત્રમાં સ્પષ્ટ કર્યું છે કે તેમણે પરવાનગી આપતી વખતે લોકસુવિધાનું સંપૂર્ણ ધ્યાન રાખ્યું છે. શહેરમાં ઘણી ગરબીઓ વહેલી સવારના 4 વાગ્યા સુધી ચાલતી હોય છે, જેના બદલે આ ગરબી રાત્રે 11:30 વાગ્યા સુધીમાં સંપૂર્ણપણે પૂરી થઈ જવી જોઈએ તેવી કડક સૂચના આપવામાં આવી છે.
પ્લોટમાં રાખવામાં આવેલી સુવિધાઓ:
વિશાળ પાર્કિંગની વ્યવસ્થા: વાહનો રસ્તા પર ન ખડકાય અને લોકોને અડચણ ન પડે તે માટે પ્લોટમાં જ વાહન પાર્કિંગ માટે વિશાળ જગ્યા રાખવાની તાકીદ કરાઈ છે.
સમય મર્યાદાનું પાલન: રાત્રે 11:30 વાગ્યા પછી કોઈ લાઉડસ્પીકર કે ગરબી ચાલુ નહીં રહે.
નિયમોનું પાલન: સામાન્ય નાગરિકો કે દર્દીઓને કોઈ અગવડ ન પડે તે રીતે આયોજન ગોઠવવાની શરત રખાઈ છે.
જામસાહેબે વિરોધ કરનારાઓને આપી મહત્વની સલાહ
જામસાહેબે આશ્ચર્ય વ્યક્ત કરતાં લખ્યું છે કે, આ વિસ્તારમાં મોટાભાગે હિન્દુ વસ્તી ધરાવતા રહીશો છે, છતાં ગરબી વિરુદ્ધ વાંધા ઉઠાવવામાં આવે તે અત્યંત આશ્ચર્યજનક બાબત છે. તેમણે સ્થાનિક લોકોને અપીલ કરી છે કે તેઓ પોતાના વિચારો પર ચાલે અને બીજા સ્વાર્થી કે મતલબી તત્વોની વાતોમાં ન આવે.
અંતમાં જામસાહેબે સ્પષ્ટતા કરી કે, આ યોજનાની કલ્પના તેમની નથી અને તેઓ પોતે આનું આયોજન કરી રહ્યા નથી. સમગ્ર જામનગર શહેર માટે આ યોજના સુંદર અને કરવાલાયક લાગતાં તેમણે માત્ર પરવાનગી આપી હતી. હવે તેમને આ વિવાદમાં વચમાં પડવાની કોઈ ઈચ્છા નથી, તેથી આ મામલો આયોજકો, વિરોધ કરનારાઓ અને સરકારી અધિકારીઓએ સાથે મળીને ઉકેલી લેવો.
આ પણ વાંચો : Jamnagar ની GIDC માં યુવકની હત્યાથી ચકચાર, પરિવારમાં હૈયાફાટ આક્રંદ
