આજે સવારથી માળિયાહાટીના વિસ્તારમાં વરસાદ શરૂ થતા ખેડૂતોમાં પણ ખુશીનો માહોલ જોવા મળ્યો છે. જૂનાગઢ શહેરમાં ચોમાસાની સીઝન દરમિયાન ઘણા લાંબા સમયના વિરામ બાદ આખરે મેઘરાજાએ ધમાકેદાર આગમન કર્યું છે. વાદળછાયા વાતાવરણ વચ્ચે વરસાદે મન મૂકીને વરસવાનું શરૂ કરતાં જ સમગ્ર પંથકમાં ઠંડક પ્રસરી ગઈ છે
ગુજરાતમાં વરસાદી માહોલ જામ્યો
છેલ્લા 24 કલાકમાં 107 તાલુકામાં વરસાદ નોંધાયો છે જેમાં દક્ષિણ ગુજરાતમાં મેઘમહેર યથાવત છે. સુરતના બારડોલી, પલસાણામાં 8 ઇંચ, વલસાડના ઉમરગામમાં પોણા 8 ઇંચ, સુરતના મહુવામાં પોણા 8 ઇંચ, વલસાડના વાપીમાં સાડા 7 ઇંચ, સુરતના અંબિકા તાલુકામાં 6 ઇંચ, માંગરોળમાં 5 ઇંચ, સુરતના ઉમરપાડામાં પોણા 5 ઇંચ, પારડી, ભેંસાણ, વાલોડ, વ્યારામાં 4 ઇંચ વરસાદ નોંધાયો છે. 8 તાલુકામાં 3 ઇંચથી વધુ વરસાદ વરસ્યો છે અને અન્ય તાલુકામાં 1 ઇંચથી અઢી ઇંચ સુધીનો વરસાદ નોંધાયો છે.
સરદાર સરોવર નર્મદા ડેમમાં પાણીની આવક વધી
નર્મદા જિલ્લામાં આવેલ સરદાર સરોવર ડેમમાં પાણીની આવક વધી છે. ઉપરવાસમાંથી પાણીની આવક વધતા નર્મદામાં નવા નીરની આવક થઈ છે. ઉપરવાસમાંથી 39315 ક્યુસેક પાણીની આવક થઈ છે. ઉપરવાસ મહારાષ્ટ્ર અને મધ્યપ્રદેશમાં વરસાદને કારણે આવક વધી, હાલ નર્મદા ડેમની જળ સપાટી 126.17 મીટર છે. ડેમના CHPHના તમામ પાવર હાઉસ ચાલુ કરાતા વીજળી ઉત્પાદનમાં વધારો થયો છે.
આ પણ વાંચો : Anand : તત્કાલિન RAC કેતકી વ્યાસને સુપ્રીમ કોર્ટમાંથી મોટી રાહત, તત્કાલીન કલેકટરની ચેમ્બરમાં લગાવ્યા હતા સ્પાય કેમેરા
