અકસ્માત એટલો જોરદાર હતો કે બસના આગળના ભાગનો કચ્ચરગાણ થઈ ગયો હતો, જેના કારણે બસમાં સવાર બાળકોમાં ચીસાચીસ મચી ગઈ હતી.
હળવદમાં બ્રિલિયન્ટ સ્કૂલની બસનો ભયાનક અકસ્માત
સ્થાનિક લોકો અને રાહદારીઓ તાત્કાલિક ઘટનાસ્થળે દોડી આવ્યા હતા અને વિદ્યાર્થીઓને બસમાંથી બહાર કાઢવામાં મદદ કરી હતી. ઈજાગ્રસ્ત વિદ્યાર્થીઓને તાત્કાલિક અસરથી ચરાડવાની સરકારી હોસ્પિટલમાં સારવાર માટે ખસેડવામાં આવ્યા હતા.
પ્રાપ્ત માહિતી મુજબ, આ અકસ્માતમાં કુલ 8 વિદ્યાર્થીઓ ઈજાગ્રસ્ત થયા છે, જેમાંથી 6 વિદ્યાર્થીઓને પ્રાથમિક સારવાર ચરાડવા હોસ્પિટલમાં આપવામાં આવી રહી છે, જ્યારે વધુ ગંભીર રીતે ઈજાગ્રસ્ત થયેલા 2 વિદ્યાર્થીઓને વધુ સારવાર માટે મોરબીની હોસ્પિટલમાં ખસેડવામાં આવ્યા છે.
સ્કૂલ બસ અકસ્માતમાં 8 વિદ્યાર્થીઓ ઘાયલ
અકસ્માતના સમાચાર મળતા જ શાળાના સંચાલકો અને વિદ્યાર્થીઓના વાલીઓ હોસ્પિટલ ખાતે દોડી આવ્યા હતા. આ ઘટનાએ ફરી એકવાર સ્કૂલ બસની સુરક્ષા અને વાહન ચાલકોની બેદરકારી અંગે પ્રશ્નો ઉભા કર્યા છે. શું બસ ચાલક દ્વારા કોઈ બેદરકારી દાખવવામાં આવી હતી કે પછી અચાનક બ્રેક મારવાને કારણે આ અકસ્માત સર્જાયો, તે અંગે પોલીસ તપાસ કરી રહી છે.
હળવદ પોલીસની ટીમ ઘટનાસ્થળે પહોંચીને અકસ્માત અંગેની વધુ તપાસ હાથ ધરી છે. આ ઘટનાએ વાલીઓમાં ફફડાટ પેદા કર્યો છે અને શાળા સંચાલકોને વિદ્યાર્થીઓની સલામતી બાબતે વધુ સતર્ક રહેવા માટેની ચેતવણી આપી છે. સદનસીબે આ અકસ્માતમાં કોઈ જાનહાનિના સમાચાર નથી, પરંતુ વિદ્યાર્થીઓને થયેલી ઈજાઓને કારણે સમગ્ર પંથકમાં અરેરાટી વ્યાપી ગઈ છે.
આ પણ વાંચો : Mehsana : કડીની જયેશ રબારી ગેંગના દિવસો ભરાયા, ખૂન, ખંડણી અને વ્યાજખોરી બદલ ગુજસીટોક હેઠળ ગુનો નોંધાયો
