Narmada ના સાગબારામાં જંગલની જમીન ખેડાણ મુદ્દે જંગ, વન વિભાગ અને ખેડૂતો આમને-સામને આવતા તણાવપૂર્ણ સ્થિતિ

સાંસદના આહ્વાન અને માર્ગદર્શન બાદ મોટી સંખ્યામાં ગ્રામજનો પોતાના હકની લડાઈ લડવા માટે ખેતરોમાં પહોંચી ગયા હતા અને ખેડાણ કાર્ય શરૂ કરી દીધું હતું.

20 દિવસથી ચાલતા વિવાદમાં તણાવ વધ્યો

જોકે, વન વિભાગ દ્વારા આ જમીન પર ગેરકાયદે ખેડાણ થતું હોવાનું જણાવીને તેને તાત્કાલિક અટકાવવાની કવાયત હાથ ધરવામાં આવી હતી. પરિસ્થિતિ વણસે નહીં તે માટે પોલીસ કાફલાને પણ ઘટનાસ્થળે તૈનાત કરવામાં આવ્યો હતો. વન વિભાગ દ્વારા પોલીસ બંદોબસ્ત વચ્ચે ખેડાણ રોકવામાં આવતા ગ્રામજનો અને મહિલા આગેવાનોમાં રોષ ફાટી નીકળ્યો હતો.

આંદોલનકારી આગેવાન લીલાબેન સહિતના ગ્રામજનોએ વન વિભાગ અને પોલીસની કાર્યવાહી સામે ઉગ્ર વિરોધ નોંધાવ્યો હતો અને પોતાની જમીનના માલિકી હક માટે અડગ રહેવાની ચીમકી ઉચ્ચારી હતી.

નેતાઓની એન્ટ્રી બાદ સાગબારા પંથકમાં પોલીસનો પહેરો

આ મુદ્દે હવે અનેક રાજકીય પક્ષો અને સ્થાનિક આગેવાનો પણ સક્રિય થઈ ગયા છે, જેના કારણે આ મામલો વધુ ગરમાયો છે. આ વિવાદ માત્ર જમીન પૂરતો સીમિત નથી રહ્યો પરંતુ આદિવાસીઓના રોજી-રોટીના પ્રશ્ન સાથે જોડાઈ ગયો છે.

તંત્ર દ્વારા હાલ તો પોલીસ બંદોબસ્ત ગોઠવીને કાયદો અને વ્યવસ્થા જાળવી રાખવાના પ્રયાસો કરવામાં આવી રહ્યા છે, પરંતુ ગ્રામજનોના આક્રમક મિજાજને જોતા આગામી દિવસોમાં આ મામલે રાજકીય અને સામાજિક સ્તરે મોટો વિવાદ થવાની પૂરી સંભાવના છે.

આ પણ વાંચો : Vav Tharad ના ડેડાવા ગામે વરસાદી પાણીની કાયમી આફત, 4 દિવસથી ગામ પાણીમાં ગરકાવ, લોકોમાં ભારે રોષ