લખનઉના અલીગંજમાં ખાનગી કોચિંગ સેન્ટરમાં આગ લાગવાથી 14 બાળકોના મોતની ઘટના બાદ રાજકોટ મહાનગરપાલિકાનું ફાયર બ્રિગેડ હરકતમાં આવ્યું હતુ જેમાં ગઈકાલે શહેરના 18 વોર્ડના તમામ કોચિંગ ક્લાસ પર ફાયર બ્રિગેડ વિભાગ દ્વારા ચેકિંગ હાથ ધરવામાં આવ્યું હતું.
ફાયર વિભાગે 18 કોચિંગ ક્લાસિસને ફટકારી નોટિસ
સમગ્ર રાજકોટમાં કુલ 18 વોર્ડ આવેલા છે અને અલગ-અલગ વોર્ડમાં આગામી દિવસોમાં ફાયર સાધનોને લઈ કલાસિસમાં ચેકિંગ પણ કરવામાં આવશે અને ફાયરના સાધનોની સંપૂર્ણ પણે કામ નહી કરતા હોય અથવા તેમાં કોઈ ખામી હશે તો તે સંચાલકને નોટિસ આપવામાં આવશે.
અને નોટિસ આપ્યા બાદ પણ જો કામગીરી નહી કરી હોય તો કલાસિસ સીલ સુધીની કાર્યવાહી ફાયર વિભાગ કરી શકે છે. તો કલાસિસના સંચાલકોમાં પણ ફફડાટ જોવા મળ્યો હતો અને જે કલાસિસમાં ફાયર સાધનોમાં વિસંગતતા હતી તે લોકોએ કામગીરી શરૂ પણ કરી દીધી છે.
7 દિવસમાં ફાયર સેફટીના સાધનોની કામગીરી પૂર્ણ કરવા આદેશ
ફાયર વિભાગની ટીમ દ્વારા અલગ-અલગ કલાસિસોમાં ચેકિંગ કરવામાં આવ્યું હતુ અને સ્થળ પર જ નોટિસ આપવામાં આવી હતી, જે કલાસિસમાં સંપૂર્ણ પણ ફાયર વિભાગની સિસ્ટમ એકટિવ છે તેના સાધનો પણ ચેક કરવામાં આવ્યા હતા.
તો આગામી દિવસોમાં રાજકોટ ફાયર વિભાગ અન્ય કલાસિસમાં પણ આ રીતની કાર્યવાહી કરશે અને જો કલાસિસના સંચાલકો મનમાની કરશે તો તેમની મિલકતને સીલ કરી દેવામાં આવશે અને દંડ પણ ફટકારવામાં આવશે.
આ પણ વાંચો : Vadodara : શિનોરમાં બાળકીની હત્યા કરનાર આરોપીએ PSIની રિવોલ્વર ઝૂંટવી ગોળીબાર કર્યો, પોલીસનો કાફલો ઘટના સ્થળે દોડી આવ્યો
