Rajkot મનપાનો સપાટો, અખાદ્ય ખોરાક વેચતી 10 દુકાનો સીલ કરી 476 કિલો ખોરાકનો નાશ કરાયો

અખાદ્ય અને વાસી ખોરાક જપ્ત કરવામાં આવ્યો હતો

સીલ કરવામાં આવેલી પેઢીઓમાં હાઉસ ઓફ સ્નેક્સ, આર.બી. ફૂડ, જય અંબે લાઇવ વેફર્સ, જલારામ ટ્રેડર્સ, સતગુરૂ ફરસાણ નમકીન એન્ડ સ્વીટ, પટેલ ચાઇનીઝ ભેળ, ઇન્ડિયા રેસ્ટોરન્ટ, શ્રીજી ફૂડ, સોનલ સીઝન સ્ટોર એન્ડ ચાઇનિઝ પંજાબી, શિવ શંકર રેસ્ટોરન્ટ અને મહાદેવ પેંડાનો સમાવેશ થાય છે.

આ તમામ સંસ્થાઓ દ્વારા ગ્રાહકોના સ્વાસ્થ્યને જોખમમાં મૂકીને ગુણવત્તાહીન ચીજવસ્તુઓનું વેચાણ કરવામાં આવી રહ્યું હોવાનું સામે આવ્યું હતું. આરોગ્ય વિભાગની આ ડ્રાઇવ દરમિયાન અંદાજે 476 કિલોગ્રામ જેટલો અખાદ્ય અને વાસી ખોરાક જપ્ત કરવામાં આવ્યો હતો.જેનો સ્થળ પર જ નાશ કરવામાં આવ્યો છે જેથી તે બજારમાં ફરી વેચાણ અર્થે ન પહોંચી શકે.

75 હજારનો દંડ વસૂલ કરવામાં આવ્યો

આ ઉપરાંત, નિયમોનું ઉલ્લંઘન કરતી અન્ય 29 પેઢીઓને નોટિસ ફટકારવામાં આવી છે અને તેમની પાસેથી દંડ પેટે કુલ 75,000 રૂપિયાની રકમ વસૂલ કરવામાં આવી છે. મનપાના આ પગલાંથી ખાણીપીણીના ધંધાર્થીઓમાં ભારે ફફડાટ ફેલાઈ ગયો છે.

આરોગ્ય અધિકારીઓએ સ્પષ્ટ ચેતવણી આપી છે કે આગામી દિવસોમાં પણ આ પ્રકારની સરપ્રાઈઝ ચેકિંગ ઝુંબેશ ચાલુ રહેશે અને નાગરિકોના આરોગ્ય સાથે ચેડાં કરનાર કોઈપણ વ્યક્તિ કે સંસ્થાને બક્ષવામાં આવશે નહીં.

આ પણ વાંચો : Ahmedabad : રામોલમાં ફટાકડા ફેક્ટરી બ્લાસ્ટના પડઘા, વસ્ત્રાલમાં બે ગેરકાયદે ફટાકડાની ફેક્ટરી પર ચાલ્યું બુલડોઝર