Ship Accident: સલાયાનું જહાજ ઓમાનના દરિયામાં ડૂબ્યું, 2ના મોત અને 12નો સફળ બચાવ

ઊંચા મોજાઓને કારણે જહાજ ડુબ્યું

પ્રાપ્ત માહિતી અનુસાર, ઓમાન નજીકના દરિયાઈ વિસ્તારમાં ખરાબ હવામાન અને ઊંચા મોજાઓને કારણે જહાજ પર સંકટના વાદળો ઘેરાયા હતા. ખરાબ વાતાવરણની અસરને પગલે જહાજના બંને મુખ્ય એન્જિન અચાનક બંધ પડી ગયા હતા, જેના કારણે જહાજ દરિયાના મોજાં સામે લાચાર બની ગયું હતું. એન્જિન બંધ પડતાની સાથે જ જહાજમાં દરિયાનું પાણી ઝડપથી ઘૂસવા લાગ્યું હતું. પરિસ્થિતિ એટલી ગંભીર બની ગઈ હતી કે જહાજ ગણતરીની મિનિટોમાં જ દરિયાના પેટાળમાં ગરકાવ થઈ ગયું હતું.

Ship Accident: આ દુર્ઘટનામાં બે ખલાસીઓના કરુણ મોત

આ દુર્ઘટનામાં બે ખલાસીઓના કરુણ મોત નીપજ્યા છે, જેમની ઓળખ ગાંધર યાસીન નૂરમામદ અને ભાયા ઇમરાન ઇશાક તરીકે કરવામાં આવી છે. ઘટનાની જાણ થતાં જ ઓમાની નેવી અને નજીકમાંથી પસાર થઈ રહેલા અન્ય જહાજો દ્વારા ત્વરિત રેસ્ક્યૂ ઓપરેશન હાથ ધરવામાં આવ્યું હતું. સદનસીબે, 14 ખલાસીઓમાંથી ૧૨ ભારતીય ખલાસીઓને સુરક્ષિત રીતે બચાવી લેવામાં સફળતા મળી હતી. બચાવી લેવાયેલા ૧૨ ખલાસીઓ અને બંને મૃતકોના પાર્થિવ દેહને હાલ ઓમાન પહોંચાડવામાં આવ્યા છે. સલાયાના આ પરિવારોમાં શોકની લાગણી ફેલાઈ છે અને સ્થાનિક વહીવટીતંત્ર દ્વારા મૃતકોના પરિવારજનોને મદદ પહોંચાડવા તજવીજ હાથ ધરવામાં આવી છે. આ દુર્ઘટનાએ દરિયાઈ મુસાફરીમાં હવામાનની અનિશ્ચિતતા અને સુરક્ષાના પ્રશ્નો ફરી એકવાર જીવંત કર્યા છે.

આ પણ વાંચો: Gujarat Rain: આગામી 7 દિવસ રાજ્યમાં મધ્યમ વરસાદની આગાહી, સીઝનનો કુલ 162.5 મીમી વરસાદ નોંધાયો