Surat Rain: સુરતની વરસાદથી ગંભીર સ્થિતિ, અનેક વિસ્તારોમાં ભારાયા પાણી, લોકોને રેસ્ક્યુ કરવાની પડી ફરજ

ડીંડોલી વિસ્તારની વિકટ સ્થિતિ:

ડીંડોલીના દેલાડવા રોડ પર આવેલી શિવશક્તિ વિલા સોસાયટીમાં પાણી ભરાવાની સમસ્યા ગંભીર બની છે. સોસાયટીના પાર્કિંગ અને કેમ્પસમાં કમર સુધી પાણી ભરાઈ ગયા છે, જેના કારણે રહેવાસીઓ ઘરમાં કેદ થઈ ગયા છે. અનેક વાહનો પાણીમાં ડૂબી ગયા છે, જેનાથી સ્થાનિકોમાં પાલિકાની પ્રિ-મોન્સૂન કામગીરી સામે ભારે રોષ જોવા મળી રહ્યો છે.

વેડ રોડ પર જળપ્રલય

કતારગામ-વેડ રોડ પર સ્થિત રોયલ આર્કેડની આસપાસના રસ્તાઓ નદીમાં ફેરવાઈ ગયા છે. મુખ્ય માર્ગો પર પાણીનો પ્રવાહ એટલો તેજ છે કે વાહનો રસ્તા પર જ બંધ પડી રહ્યા છે. વેપારીઓની દુકાનોમાં પાણી ઘૂસી જતાં મોટું આર્થિક નુકસાન થયું છે અને લોકોની અવર-જવર મુશ્કેલ બની છે.

Surat Rain:  ઓલપાડ (કીમ) માં શ્રદ્ધા પર વરસાદી આફત

ઓલપાડના કીમ ગામમાં સ્થિત હરિહરેશ્વર મહાદેવ અને રાધાકૃષ્ણ મંદિર પરિસરમાં વરસાદી પાણી ઘૂસી ગયા છે. ગર્ભગૃહમાં પાણી ભરાતા શિવલિંગ પણ ડૂબી ગયું છે. સ્થાનિક લોકોના જણાવ્યા મુજબ, ડ્રેનેજ વ્યવસ્થાના અભાવે છેલ્લા ત્રણ વર્ષથી આવી સ્થિતિ સર્જાય છે. શ્રદ્ધાળુઓ પાણીમાં ઉભા રહીને જ પૂજા-અર્ચના કરવા માટે મજબૂર બન્યા છે.

પાલિકા કમિશનરની અપીલ

સુરત મ્યુનિસિપલ કમિશનર એમ. નાગરાજને પરિસ્થિતિની ગંભીરતા સમજાવતા જણાવ્યું હતું કે, "શહેરમાં કેટલાક સ્થળો પર ૫૦ mm થી વધુ વરસાદ નોંધાયો છે. ભેદવાડ અને સીમાડા ખાડીઓ ભયજનક સપાટી પરથી વહી રહી છે. સાવચેતીના ભાગરૂપે ઘણા રસ્તાઓ બંધ કરાયા છે. લોકો શોર્ટ સર્કિટના જોખમથી બચે અને બિનજરૂરી ઘરોની બહાર ન નીકળે."

આ પણ વાંચો: મહેસાણામાં મોટી કાર્યવાહી: સરકારી મિટિંગમાં ટી-શર્ટ પહેરીને આવતા ડે.કમિશનરને નોટિસ