Surat માં વરસાદનો 85 વર્ષનો રેકોર્ડ તૂટયો, 20 ઈંચ વરસાદે શહેરને કર્યું બેહાલ

સલામતીના ભાગરૂપે શાળા-કોલેજોમાં રજા જાહેર કરી દેવામાં આવી

સુરત શહેરમાં તો ધોધમાર વરસાદ વરસ્યો જ. પણ સાથે જિલ્લાના કામરેજ, પલસાણા સહિતના વિસ્તારમાં પણ સાંબેલાધાર વરસાદ પડતા સુરત શહેરમાંથી પસાર થતી પાંચમાંથી ચાર ખાડી ઓવરફ્લો થઈ ગઈ અને ભયજનક સપાટીથી ઉપર વહેવા લાગી.

જેના કારણે ખાડીની આસપાસના વિસ્તારોમાં પાણી ફરી વળતા લોકોનું સલામત સ્થળે રેસ્ક્યૂ કરવાની ફરજ પડી હતી. શહેરના મુખ્ય માર્ગો, સોસાયટીઓ અને નીચાણવાળા વિસ્તારો સંપૂર્ણપણે પાણીમાં ગરકાવ થઈ ગયા છે. વાહનવ્યવહાર ઠપ્પ થઈ ગયો છે અને જનજીવન સંપૂર્ણપણે અસ્તવ્યસ્ત બન્યું છે.

રેકોર્ડબ્રેક વરસાદ અને જળબંબાકાર સુરત

આ કુદરતી આફતમાં દક્ષિણ ગુજરાતમાં અત્યાર સુધી 11 લોકોએ પોતાના જીવ ગુમાવ્યા હોવાના અહેવાલો છે, જેનાથી સમગ્ર રાજ્યમાં અરેરાટી વ્યાપી ગઈ છે. સ્થિતિની ગંભીરતાને ધ્યાનમાં રાખીને વહીવટી તંત્ર દ્વારા યુદ્ધના ધોરણે રાહત અને બચાવ કામગીરી શરૂ કરવામાં આવી છે.

સુરત શહેરમાંથી અત્યાર સુધીમાં 2100 જેટલા નાગરિકોનું સુરક્ષિત સ્થળોએ સ્થળાંતર કરવામાં આવ્યું છે. લોકોની સુરક્ષાને સર્વોપરી રાખીને નવસારી, વલસાડ અને સુરત જિલ્લાની તમામ શાળાઓ તેમજ કોલેજોમાં રજા જાહેર કરી દેવામાં આવી છે.

આ પણ વાંચો : Navsari Rain : પૂર્ણા નદીનું રૌદ્ર સ્વરૂપ, ભયજનક સપાટી વટાવી નદી વહી રહી છે ગાંડીતૂર