Surendranagar જિલ્લામાં મેઘરાજાનો કહેર, સ્ટેટ હાઇવે બંધ, લખતર અને ધ્રાંગધ્રા પંથકમાં જળબંબાકારથી અનેક ગામો સંપર્ક વિહોણા

લીંબડી સુરેન્દ્રનગર સ્ટેટ હાઇવે પર પુરના પાણી ફરી વળ્યા

લીંબડી સુરેન્દ્રનગર સ્ટેટ હાઇવે પર પુરના પાણી ફરી વળતા સ્ટેટ હાઇવે બંધ કરવાની ફરજ પડી છે, લીંબડી પંથકમાં રેડ એલર્ટ વચ્ચે બારે મેઘ થતા ભારે વરસાદના કારણે પુરના પાણી ફરી વળ્યા છે જેના પરિણામે લીંબડી સુરેન્દ્રનગર સ્ટેટ હાઇવે પર સમલા અને રઇ સાંકળી પાસે રોડ પર પાણી ફરી વળતા હાલ મુસાફરોની સલામતીની ધ્યાને રાખી જિલ્લા વહીવટી તંત્ર દ્વારા લીંબડી સુરેન્દ્રનગર સ્ટેટ હાઇવે હાલ બંધ કરવામાં આવ્યો છે.

લખતર તાલુકામાં વધુ વરસાદને લઈ લરખડીયા ગામ બેટમાં ફેરવાયું

ભારે વરસાદના કારણે લખતર તાલુકાના લરખડીયા ગામ બન્યું સંપર્ક વિહોણું અને લરખડીયા ગામ ઉમઇ નદીના પાણી ફરી વળ્યાં છે સાથે સાથે ગામમાં આવવા જવાનો રસ્તો થયો બંધ અને લરખડીયા ગામ તાલુકા મથકથી સંપર્ક તૂટ્યો છે.

મુખ્ય બજારોમાં પાણી ભરાયા

ધ્રાંગધ્રા શહેરમાં ધોધમાર વરસાદને પગલે શહેરના મુખ્ય બજારોમાં વરસાદી પાણી ભરાતા હાલાકી સ્થાનિકો ભોગવી રહ્યાં છે, ભારે વરસાદના કારણે શહેરની મુખ્ય બજાર અને કમલચોક સહિતના વિસ્તારમાં વરસાદી પાણી ભરાયા છે મુખ્ય બજારમાં અંદાજે દોઢ થી બે ફૂટ જેટલા વરસાદી પાણી ભરાયા છે અને આગામી સમયમાં વધુ વરસાદ થાય તો સ્થિતિ વધુ ખરાબ બની જાય તેવી પણ શક્યતાઓ સેવાઈ રહી છે.

ખેડૂતોના પાકને વ્યાપક નુકસાન થયું

લખતરમાં ભારે વરસાદને લઈ તારાજી સરજી અને ગામડાઓમાં પાણી ભરાયા છે. લખતરના લીલાપુર ગામ ખાતે એક બાજુ રેલવે અંડર પાસ બીજી બાજુ ઉમય નદીના પાણી ગામમાં ઘુસ્યા છે. બંને બાજુ પાણી આવી જતા લીલાપુર ગામ બન્યું સંપર્ક વિહોણું ગામમાં જવા માટે કોઈ રસ્તો દેખાતો નથી અને લીલાપુર ગામના સ્થાનિકોનું કહેવું છે કે, રેલવે તંત્રની બેદરકારીના કારણે વારંવાર અંડરપાસમાં પાણી ભરાઈ જાય છે અને પછી પાણી નિકાલની કોઈ વ્યવસ્થા નથી.

આ પણ વાંચો : Kheda ના વસોમાં જળપ્રલય, 17 ઇંચથી વધુ વરસાદ ખાબકતા 100થી વધુ ઘરોમાં પાણી ભરાયા