Surendranagar : જળબંબાકાર લખતર, 24 કલાકમાં 8 ઈંચ વરસાદ ખાબકતા ચાર ગામો સંપર્ક વિહોણા

કેસરિયા ગામો બેટમાં ફેરવાયા

આ ગામો તરફ જતા રસ્તાઓ પર પાણી ફરી વળવાથી વાહનવ્યવહાર સંપૂર્ણ ઠપ થઈ ગયો છે. ખાસ કરીને રાત્રિના સમયે પડેલા મુશળધાર વરસાદને કારણે લખતરના ઓળક ગામમાં આવેલા રામદેવપીર પરા વિસ્તારમાં પાણી ફરી વળ્યા હતા, જેના કારણે અનેક પરિવારો ઘરોમાં જ ફસાઈ ગયા હતા.

પરિસ્થિતિની ગંભીરતાને ધ્યાનમાં રાખીને સુરેન્દ્રનગર જિલ્લા વહીવટી તંત્ર અને લખતર મામલતદાર તંત્ર તાત્કાલિક હરકતમાં આવ્યા હતા. રાત્રિના સમયે જ ફસાયેલા લોકોને સુરક્ષિત બહાર કાઢવા માટે ફાયર વિભાગની ટીમને મેદાને ઉતારવામાં આવી હતી. ફાયર ટીમ દ્વારા ઓળક ગામના પૂરગ્રસ્ત વિસ્તારમાં જઈને અત્યંત જોખમી પરિસ્થિતિ વચ્ચે રેસ્ક્યુ ઓપરેશન હાથ ધરવામાં આવ્યું હતું.

સુરક્ષિત સ્થળે સ્થળાંતર

ફાયર જવાનોએ પોતાની જાનની પરવા કર્યા વગર પાણીમાં ફસાયેલા તમામ ગ્રામજનોને હેમખેમ બહાર કાઢ્યા હતા. રેસ્ક્યુ કરાયેલા આ તમામ રઈશો અને ગ્રામજનોને તાત્કાલિક ધોરણે નજીકની સુરક્ષિત જગ્યાઓ પર સ્થળાંતર કરવામાં આવ્યા છે.

તંત્ર દ્વારા આ આશ્રયસ્થાન પર ફસાયેલા લોકો માટે ખાવા-પીવા સહિતની પ્રાથમિક સુવિધાઓ પણ ઉપલબ્ધ કરાવવામાં આવી છે. સમયસર હાથ ધરેલા આ બચાવ કાર્યના કારણે કોઈ મોટી જાનહાની ટળી ગઈ હતી, પરંતુ આ ભારે વરસાદે ગ્રામીણ જનજીવનને અસ્થિર કરી દીધું છે.

આ પણ વાંચો : Kheda : ભ્રષ્ટાચારનો પર્દાફાશ, મહેમદાવાદના મોદજ ગામે 20 લાખના ખર્ચે બનેલો કોમ્યુનિટી હોલ પ્રથમ વરસાદમાં જ ધરાશાયી