શું છે તરૂણ તેજપાલ સામેનો સમગ્ર મામલો?
આ કેસ વર્ષ 2013નો છે. તહેલકા મેગેઝિનની એક જુનિયર મહિલા સહકર્મીએ આરોપ લગાવ્યો હતો કે ગોવામાં આયોજિત એક કાર્યક્રમ દરમિયાન તરૂણ તેજપાલે એક હોટલની લિફ્ટમાં તેની સાથે યૌન ઉત્પીડન કર્યું હતું. ફરિયાદ બાદ પોલીસે કેસ નોંધ્યો હતો અને તપાસ શરૂ કરવામાં આવી હતી. આ મામલો સામે આવ્યા બાદ મીડિયા જગતમાં પણ ભારે ચર્ચા શરૂ થઈ હતી, કારણ કે આરોપ એક જાણીતા પત્રકાર અને મીડિયા સંસ્થાના વડા સામે હતો. આ કેસમાં તપાસ દરમિયાન વિવિધ પુરાવાઓ એકત્ર કરવામાં આવ્યા હતા, જેમાં ફરિયાદીના નિવેદનો, સાક્ષીઓના નિવેદનો, ઇમેઇલ સંવાદ અને અન્ય દસ્તાવેજોનો સમાવેશ થતો હતો. આ તમામના આધારે આજે બોમ્બે હાઈકોર્ટની ગોવા બેન્ચે તેજપાલને દોષિત ઠેરવ્યા અને તેમને 10 વર્ષની જેલની સજા ફટકારી.
ટ્રાયલ કોર્ટે 2021માં કર્યો હતો નિર્દોષ જાહેર
લાંબી કાનૂની પ્રક્રિયા બાદ વર્ષ 2021માં ગોવાની માપુસા સેશન્સ કોર્ટે તરૂણ તેજપાલને આરોપોમાંથી મુક્ત કર્યા હતા. ટ્રાયલ કોર્ટે પોતાના નિર્ણયમાં કહ્યું હતું કે રજૂ કરાયેલા પુરાવાઓના આધારે આરોપો શંકાથી પર સાબિત થતા નથી. તેથી કોર્ટે તેજપાલને નિર્દોષ જાહેર કર્યા હતા. જોકે, આ નિર્ણય સામે ગોવા સરકારે અસંતોષ વ્યક્ત કર્યો હતો અને બોમ્બે હાઈકોર્ટમાં અપીલ દાખલ કરી હતી.
ગોવા સરકારે હાઈકોર્ટમાં શું દલીલ કરી?
ગોવા સરકારે બોમ્બે હાઈકોર્ટ સમક્ષ કેસની સુનાવણી દરમિયાન સખત રજૂઆત કરતા જણાવ્યું હતું કે નીચલી કોર્ટે કેસના મૂળ પુરાવાઓ અને દસ્તાવેજોની ગંભીરતાથી તપાસ કરવાના બદલે સમગ્ર ધ્યાન પીડિતાના અંગત જીવન, વર્તન અને તેની પ્રતિક્રિયાઓ પર જ કેન્દ્રિત રાખ્યું હતું. રાજ્ય તરફથી સ્પષ્ટ દલીલ કરવામાં આવી હતી કે ટ્રાયલ કોર્ટે મહત્વપૂર્ણ અને નિર્ણાયક પુરાવાઓને સંપૂર્ણપણે અવગણ્યા છે, જેના લીધે યોગ્ય ન્યાયી પ્રક્રિયા ચાલવાને બદલે વાસ્તવમાં "પીડિતાની જ ટ્રાયલ" લેવાઈ રહી હોય તેવી અયોગ્ય અને પક્ષપાતી પરિસ્થિતિનું નિર્માણ થયું હતું.
બોમ્બે હાઈકોર્ટે કેમ બદલ્યો નિર્ણય?
બોમ્બે હાઈકોર્ટની ગોવા બેન્ચે રાજ્ય સરકારની અપીલ સ્વીકારી અને સેશન્સ કોર્ટના નિર્ણયને રદ કર્યો. ન્યાયમૂર્તિ ડૉ. નીલા ગોખલે અને ન્યાયમૂર્તિ અમિત જામસાંડેકરની ડિવિઝન બેન્ચે કેસના તમામ પાસાઓનું ફરીથી મૂલ્યાંકન કર્યું. હાઈકોર્ટે માન્યું કે ટ્રાયલ કોર્ટ દ્વારા કરવામાં આવેલા પુરાવાઓના મૂલ્યાંકનમાં ખામીઓ હતી અને કેસમાં ઉપલબ્ધ સામગ્રીને યોગ્ય દૃષ્ટિકોણથી જોવાની જરૂર હતી. આ આધારે હાઈકોર્ટે તરૂણ તેજપાલને દોષિત ઠેરવ્યા અને 10 વર્ષની સજાનો નિર્ણય આપ્યો.
ચુકાદા સમયે કોર્ટમાં હાજર હતા તેજપાલ
હાઈકોર્ટનો ચુકાદો જાહેર કરવામાં આવ્યો ત્યારે તરૂણ તેજપાલ કોર્ટમાં હાજર હતા. અગાઉ જ્યારે કેસનો ચુકાદો અનામત રાખવામાં આવ્યો હતો ત્યારે હાઈકોર્ટ બેન્ચે તેમને ચુકાદાના દિવસે કોર્ટમાં હાજર રહેવાનો નિર્દેશ આપ્યો હતો. હાઈકોર્ટે રાજ્યના સીઆઈડી દ્વારા દાખલ કરવામાં આવેલી અપીલ પર સુનાવણી કરી હતી. આ કેસમાં રાજ્ય તરફથી સોલિસિટર જનરલ તુષાર મહેતા અને ગોવાના એડવોકેટ જનરલ દેવીદાસ પંગમ સહિતના વકીલોએ દલીલો રજૂ કરી હતી.
'માફીનો ઇમેઇલ' બન્યો ચર્ચાનો મુદ્દો
આ કેસમાં એક મહત્વપૂર્ણ મુદ્દો તરૂણ તેજપાલ દ્વારા મોકલવામાં આવેલો કથિત 'માફીનો ઇમેઇલ' રહ્યો હતો. દલીલ કરવામાં આવી હતી કે, ફરિયાદીએ કંપનીના મેનેજિંગ એડિટરને યૌન સતામણી અંગે જાણ કર્યા બાદ તેજપાલે તેને એક ઇમેઇલ મોકલ્યો હતો. રાજ્ય સરકારનું કહેવું હતું કે, આ ઇમેઇલ મહત્વપૂર્ણ પુરાવો હતો, જેને ટ્રાયલ કોર્ટે યોગ્ય મહત્વ આપ્યું નહોતું. હાઈકોર્ટ સમક્ષ આ મુદ્દા પર પણ ચર્ચા થઈ અને કેસના સમગ્ર પુરાવાઓનું પુનઃમૂલ્યાંકન કરવામાં આવ્યું.
આ પણ વાંચો : Tarun Tejpal Case : બોમ્બે હાઈકોર્ટે સેશન્સ કોર્ટનો આદેશ ફગાવી તરુણ તેજપાલને ઠેરવ્યા દોષિત
