ઘટનાની જાણ થતાની સાથે પોલીસ અને FSLની ટીમ સ્થળ પર પહોંચી હતી અને તપાસ શરૂ કરી હતી.
મોડી રાત્રે દોઢ વાગ્યે થયું ફાયરિંગ
વડોદરાના ભાયલી વિસ્તારમાં આવેલા પ્રિયા સિનેમા રોડ પાસે આ ઘટના બની હતી. 'આરાના 48 નામના બિલ્ડિંગમાં મોડી રાત્રે આશરે 1.30 વાગ્યાની આસપાસ અજાણ્યા શખ્સોએ આ બિલ્ડિંગના બીજા માળે આવેલા ફ્લેટ નંબર 201ની બહારથી ફાયરિંગ કર્યુ હતુ.
રાત્રિના સમયે અચાનક ફાયરિંગ થતા ફ્લેટમાં રહેતા લોકો અને આસપાસના રહીશો ફફડી ઉઠ્યા હતા અને ભારે અફરાતફરી મચી ગઈ હતી.
સદનસીબે જાનહાનિ ટળી
બિલ્ડિંગના બીજા માળના ફ્લેટ પર બહારથી કરવામાં આવેલા આ ફાયરિંગ દરમિયાન સદનસીબે એક મોટી જાનહાનિ ટળી ગઈ છે. આ ઘટનામાં ફ્લેટની અંદર હાજર કોઈ પણ વ્યક્તિને ઈજા પહોંચી નથી, ફાયરિંગના કારણે ઘરની બારીના કાચ તૂટીને વેરવિખેર થઈ ગયા હતા.
વડોદરા તાલુકા પોલીસનો મોટો કાફલો તાત્કાલિક ઘટનાસ્થળે દોડી ગયો હતો. પોલીસે મામલાની ગંભીરતાને ધ્યાનમાં રાખીને ફોરેન્સિક સાયન્સ લેબોરેટરી (FSL)ની ટીમને પણ સ્થળ પર બોલાવી લીધી હતી. FSLની ટીમે ઘટનાસ્થળેથી કાર્તૂસના ખોખા અને અન્ય મહત્વના વૈજ્ઞાનિક પુરાવા એકત્રિત કરવાની કામગીરી હાથ ધરી છે.
ફાયરિંગનું કારણ હજુ અકબંધ
પોલીસે બિલ્ડિંગ અને આસપાસના સીસીટીવી (CCTV) ફૂટેજ મેળવીને હુમલાખોરોની ભાળ મેળવવા માટે અલગ-અલગ ટીમો બનાવીને વધુ તપાસ હાથ ધરી છે. ફાયરિંગ કેમ કરવામાં આવ્યું તેનું કારણ હજી અકબંધ છે.
આ પણ વાંચો : Mehsana Rain : કડીમાં એક જ રાતમાં બારે મેઘ ખાંગા, 9 ઇંચ વરસાદથી જળબંબાકાર
