જોકે, સૌથી વધુ ધ્યાન ખેંચતો મુદ્દો કોવિડ-19 (COVID-19) દરમિયાન અટકાવવામાં આવેલા 18 મહિનાના મોંઘવારી ભથ્થાના બાકી એરિયર્સ (DA Arrears)નો છે. લાંબા સમયથી કેન્દ્રીય કર્મચારીઓ આ બાકી રકમ ચૂકવવાની માંગ કરી રહ્યા છે. હવે જ્યારે આઠમા પગાર પંચની પ્રક્રિયા આગળ વધી રહી છે ત્યારે ફરી એકવાર આ મુદ્દો ચર્ચામાં આવ્યો છે. જોકે, સરકારનું વલણ હજુ સુધી બદલાયું હોય તેવા કોઈ સંકેતો મળ્યા નથી.
DA એરિયર્સનો મુદ્દો શું છે?
કોવિડ-19 મહામારી (COVID-19 Pandemic) દરમિયાન દેશની આર્થિક પરિસ્થિતિને ધ્યાનમાં રાખીને કેન્દ્ર સરકારે જાન્યુઆરી 2020થી જૂન 2021 સુધી કુલ 18 મહિના માટે મોંઘવારી ભથ્થું (Dearness Allowance - DA) અને ડિયરનેસ રિલીફ (Dearness Relief - DR)માં વધારો સ્થગિત કરવાનો નિર્ણય લીધો હતો. પરિણામે આ સમયગાળા દરમિયાન કર્મચારીઓને વધારાનો DA મળ્યો નહોતો. જોકે, જુલાઈ 2021થી સરકાર દ્વારા ફરીથી DAમાં વધારો શરૂ કરવામાં આવ્યો હતો, પરંતુ 18 મહિનાની બાકી રકમ હજુ સુધી ચૂકવવામાં આવી નથી. તેથી કર્મચારી સંગઠનો સતત આ બાકી રકમ ચૂકવવાની માંગ કરી રહ્યા છે.
સરકારનું વલણ શું છે?
કર્મચારી સંગઠનોને આશા છે કે આઠમા પગાર પંચની પ્રક્રિયા દરમિયાન સરકાર DA એરિયર્સ અંગે સકારાત્મક નિર્ણય લઈ શકે. જોકે, સરકાર અગાઉથી જ પોતાનું વલણ સ્પષ્ટ કરી ચૂકી છે. સરકારે સંસદ (Parliament)માં જણાવ્યું હતું કે કોવિડ-19 દરમિયાન સરકારી નાણાંકીય સ્થિતિ (Financial Position) પર ભારે દબાણ હતું. આ કારણસર DA અને DRના 3 હપ્તા (Installments) રોકવામાં આવ્યા હતા. સરકારના જણાવ્યા મુજબ, તે સમયગાળાની બાકી રકમ ચૂકવવાનો હાલમાં કોઈ પ્રસ્તાવ વિચારણા હેઠળ નથી.
આ ઉપરાંત, 15 એપ્રિલ 2026ના રોજ ખર્ચ વિભાગ (Department of Expenditure) દ્વારા જાહેર કરાયેલા સત્તાવાર સૂચનામાં પણ સ્પષ્ટ કરવામાં આવ્યું હતું કે મહામારી દરમિયાન કલ્યાણકારી યોજનાઓ (Welfare Schemes) પર સતત થયેલા ખર્ચ અને તેની આર્થિક અસર 2020-21ના નાણાકીય વર્ષ (Financial Year) પછી પણ ચાલુ રહી હતી. તેથી સરકાર માટે DA એરિયર્સની ચુકવણી શક્ય બની નહોતી.
આઠમા પગાર પંચ પાસેથી શું અપેક્ષા?
હાલમાં આઠમા પગાર પંચની બેઠકો ચાલી રહી હોવાથી કર્મચારી સંગઠનોએ ફરી એકવાર DA એરિયર્સનો મુદ્દો ઉઠાવ્યો છે. જોકે, નિષ્ણાતોનું માનવું છે કે પગાર પંચનું મુખ્ય કાર્ય પગાર (Salary), ભથ્થાં (Allowances) અને પેન્શન (Pension)ની સમીક્ષા કરીને ભલામણો આપવાનું છે. DA એરિયર્સ ચૂકવવાનો અંતિમ નિર્ણય કેન્દ્ર સરકાર જ કરશે.
જુલાઈ DA વધારાની પણ રાહ
DA એરિયર્સ ઉપરાંત કેન્દ્રીય કર્મચારીઓ હવે જુલાઈ-ડિસેમ્બર અર્ધવાર્ષિક DA વધારાની પણ આતુરતાથી રાહ જોઈ રહ્યા છે. સરકાર દ્વારા આ વધારાની જાહેરાત સામાન્ય રીતે સપ્ટેમ્બર અથવા ઓક્ટોબર મહિનામાં કરવામાં આવે છે. મીડિયા અહેવાલો મુજબ, આ વખતે સરકાર 3 ટકા સુધી DA વધારો જાહેર કરી શકે છે. જો આવું થશે તો કેન્દ્રીય કર્મચારીઓનું મોંઘવારી ભથ્થું વધીને 63 ટકા સુધી પહોંચી શકે છે, જે લાખો કર્મચારીઓ અને પેન્શનધારકો (Pensioners) માટે મોટી રાહત સાબિત થઈ શકે છે.
આ પણ વાંચો : Modi Cabinet Reshuffle : મોદી કેબિનેટમાં કોણ થશે IN અને કોણ થશે OUT? જાણો સમગ્ર રાજકીય સમીકરણ
