Jewels of Gujarat: પારિવારિક પૃષ્ઠભૂમિ અને માતૃભૂમિ સાથે જોડાણ
આ પ્રતિભાશાળી કલાકારના પૂર્વજો ગુજરાતના જામનગર જિલ્લાના ઉંઝિયા ગામથી કેન્યા સ્થળાંતરિત થયા હતા. ત્યારબાદ તેમના માતા અનીતાબેન અને પિતા રાજ પટેલ લંડન આવીને વસ્યા હતા. લંડનમાં જ 23 April 1990 ના રોજ આ મહાન કલાકારનો જન્મ થયો હતો. તેમના પિતા આઈટી કન્સલ્ટન્ટ તરીકે કામ કરે છે. માતા-પિતાએ હંમેશાં પોતાના બાળકોને નમ્રતાના પાઠ ભણાવ્યા છે. તેઓ પોતાના સંતાનોને સપના પૂરા કરવાની પ્રેરણા આપે છે.
Jewels of Gujarat: બાળપણ અને શરૂઆતનું શિક્ષણ
તેમનું બાળપણ હેરોના રેનર્સ લેન વિસ્તારમાં વીત્યું હતું. તેમણે શરૂઆતમાં લોન્ગફિલ્ડ મિડલ સ્કૂલ અને બાદમાં વ્હાઇટમોર હાઇસ્કૂલમાં અભ્યાસ કર્યો હતો. તેઓ બાળપણમાં ખૂબ જ ઉત્સાહી અને ઊર્જાવાન બાળક હતા. તેઓ ઘણીવાર શિક્ષકો માટે મુશ્કેલી ઊભી કરતા હતા. તેથી માતાએ તેમનું ધ્યાન અન્ય પ્રવૃત્તિમાં વાળવા 10 વર્ષની ઉંમરે ટાએકવોન્ડો ક્લાસમાં પ્રવેશ અપાવ્યો હતો. તેમણે આ ક્ષેત્રમાં ઘણી આંતરરાષ્ટ્રીય સ્પર્ધાઓમાં ભાગ લીધો હતો. છેવટે વર્ષ 2006 માં તેમણે બ્લેક બેલ્ટ પણ મેળવ્યો હતો.
અભિનય ક્ષેત્રે પ્રથમ પગથિયું
તેઓ જન્મથી જ બહુમુખી પ્રતિભા ધરાવતા હતા. શાળાના નાટક 'ટ્વેલ્થ નાઈટ' માં તેમણે સર એન્ડ્રુ ઓગ્યુચીકની ભૂમિકા ભજવી હતી. આ અદભુત પ્રદર્શન માટે તેમને શ્રેષ્ઠ અભિનેતાનો એવોર્ડ મળ્યો હતો. બાયોલોજી, હિસ્ટ્રી અને ડ્રામા વિષયો સાથે તેમણે વર્ષ 2007 માં પોતાનો અભ્યાસ પૂર્ણ કર્યો હતો. વર્ષ 2006 માં તેમની માતાએ અખબારમાં એક ટીન ડ્રામા 'સ્કિન્સ' માટે જાહેરાત જોઈ હતી. બીજા જ દિવસે પરીક્ષા હોવા છતાં માતા તેમને ઓડિશન માટે લઈ ગયા હતા. આ ઓડિશનમાં તેમની પસંદગી બ્રિટિશ પાકિસ્તાની મુસ્લિમ કિશોર અનવર ખારાલની ભૂમિકા માટે થઈ હતી.
સ્લમડોગ મિલિયોનર અને વૈશ્વિક સફળતા
વર્ષ 2007 માં જાણીતા ડાયરેક્ટર ડેની બોયલ પોતાની ફિલ્મ 'સ્લમડોગ મિલિયોનર' માટે જમાલ મલિકની મુખ્ય ભૂમિકા માટે કલાકારની શોધમાં હતા. તેમની પુત્રી કેટલિને 'સ્કિન્સ' સિરીઝમાં દેવ પટેલને જોયા હતા. તેણે પોતાના પિતાને આ રોલ માટે દેવનું નામ સૂચવ્યું હતું. આશરે 5 ઓડિશન આપ્યા બાદ આ મહત્ત્વપૂર્ણ રોલ માટે તેમની ફાઇનલ પસંદગી થઈ હતી. આ ફિલ્મે દુનિયાભરમાં ધૂમ મચાવી અને પ્રતિષ્ઠિત એકેડેમી એવોર્ડ્સ (ઓસ્કાર) પણ જીત્યા હતા.
જીવન બદલી નાખનારી સફળતા અને સિદ્ધિઓ
આ ભવ્ય સફળતા બાદ તેમનું આખું જીવન બદલાઈ ગયું હતું. તેમણે ક્યારેય પાછું વળીને જોયું નથી. તેમણે 'ધ રોડ વિધિન', 'લાયન' અને 'ધ મેન હુ ન્યુ ઇન્ફિનિટી' જેવી ઘણી એવોર્ડ વિજેતા ફિલ્મોમાં મુખ્ય ભૂમિકાઓ ભજવી છે. વર્ષ 2016 માં રિલીઝ થયેલી ફિલ્મ 'લાયન' માં સપોર્ટિંગ રોલ માટે તેમને પ્રતિષ્ઠિત બ BAFTA એવોર્ડ મળ્યો હતો. તેઓ સંપૂર્ણ પારિવારિક વ્યક્તિ છે. વર્ષ 2017 ના ઓસ્કાર એવોર્ડ્સ દરમિયાન તેઓ પોતાની માતાને રેડ કાર્પેટ પર સાથે લઈ ગયા હતા.
આ પણ વાંચો--- Success Story: કાયદાકીય જગતના દિગ્ગજ સાયરલ શ્રોફ, 100 વર્ષ જૂના વારસાને કેવી રીતે આપ્યો નવો આયામ?
