સોશિયલ સિક્યોરિટી કોડ હેઠળ નવી પીએફ વ્યવસ્થાની જાહેરાત
કર્મચારી ભવિષ્ય નિધિ સંગઠન (EPFO) દ્વારા લેવાયેલા આ આર્થિક નિર્ણયથી ખાનગી અને સરકારી ક્ષેત્રના કર્મચારીઓના નિવૃત્તિ ભંડોળ પર સીધી અસર પડશે. સત્તાવાર નોટિફિકેશન અનુસાર, સરકારે કુલ ત્રણ દાયકા જૂની સામાજિક સુરક્ષા યોજનાઓને 'સોશિયલ સિક્યોરિટી કોડ' હેઠળ અપડેટ કરી છે. આ અંતર્ગત એક યોજના 74 વર્ષ જૂની , બીજી 31 વર્ષ જૂની અને ત્રીજી 50 વર્ષ જૂની (EDLIS 1976) છે.
EPF 2026 સ્કીમ લાગુ થઈ
નવી વ્યવસ્થા હેઠળ, કર્મચારી ભવિષ્ય નિધિ યોજના 1952 ના સ્થાને હવે 'ઇપીએફ સ્કીમ 2026' લાગુ થઈ ગઈ છે. તેવી જ રીતે, કર્મચારી પેન્શન યોજના 1995ના સ્થાને 'ઇપીએસ 2026' અને વીમા યોજનાના સ્થાને 'એડલિસ 2026' કાર્યરત કરવામાં આવી છે, જે શ્રમિકોના હિતોનું રક્ષણ કરશે.
પીએફ ફંડ કોન્ટ્રીબ્યુશનના 12 ટકાનું ગણિત
નવા સરકારી નિયમોમાં પીએફ કોન્ટ્રીબ્યુશનની મૂળભૂત મર્યાદાને 12 ટકા પર યથાવત રાખવામાં આવી છે. આનો અર્થ એ થયો કે 15,000 રૂપિયાના માસિક બેઝિક સેલરી પર 12 ટકા મુજબ જ ફરજિયાત પીએફ કપાશે. જો કોઈ કર્મચારી તેનાથી વધુ રકમ કપાવવા ઈચ્છે છે, તો તેને સ્વૈચ્છિક યોગદાન ગણવામાં આવશે. ઉદાહરણ તરીકે, જો કોઈ કર્મચારીનો માસિક પગાર 1 લાખ રૂપિયા છે, તો નિયમ મુજબ 1,800 રૂપિયા પીએફ કપાશે અને કંપની પણ 1,800 રૂપિયા જ આપશે.
કર્મચારી સ્વૈચ્છિક રીતે યોગદાન આપી શકશે
બાકી રહેલા પગારમાંથી કર્મચારી પોતાની મરજીથી વધારાનું ભંડોળ રોકી શકે છે. કંપનીઓ માટે કર્મચારીના આ સ્વૈચ્છિક વધારાના યોગદાન જેટલું જ આર્થિક યોગદાન આપવું બિલકુલ ફરજિયાત નથી. સૌથી મહત્વની વાત એ છે કે, કર્મચારી અને એમ્પ્લોયર બંને કોઈપણ સમયે આ વધારાના સ્વૈચ્છિક ભંડોળને ઘટાડવા અથવા સંપૂર્ણપણે બંધ કરવાનો કાનૂની અધિકાર ધરાવે છે.
પૈસા ઉપાડવાના કેટેગરી નિયમોમાં કરાયેલો મોટો વહીવટી સુધારો
ભૂતકાળમાં પીએફ ખાતામાંથી વારંવાર નાની રકમો ઉપાડી લેવાના કારણે નિવૃત્તિ ભંડોળ ખાલી થઈ જતું હતું, જેને રોકવા માટે સરકારે પીએફ ઉપાડના નિયમો કડક કર્યા છે. સેન્ટ્રલ બોર્ડ ઓફ ટ્રસ્ટીઝ (CBT) ની મંજૂરી બાદ હવે પૈસા ઉપાડવા માટેની અગાઉની 13 કેટેગરીઓને ઘટાડીને માત્ર મર્યાદિત કરવામાં આવી છે. હવે કર્મચારીઓ માત્ર ગંભીર બીમારી, ઉચ્ચ શિક્ષણ, સંતાનોના લગ્ન, આવાસ નિર્માણ અથવા જમીન ખરીદી અને અન્ય કટોકટીની સ્થિતિમાં જ નાણાં ઉપાડી શકશે.
આ લોકોને મળશે 100 ટકા નાણા ઉપાડવાની મંજૂરી
નવા નિયમ મુજબ, ખાતાધારકોને જરૂરિયાતના સમયે 100 ટકા નાણાં ઉપાડવાની ટેકનિકલ મંજૂરી મળશે, પરંતુ તેમણે પોતાના પીએફ ખાતામાં કુલ જમા રકમના ઓછામાં ઓછા 25 ટકા ભંડોળ હંમેશા અનામત રાખવું પડશે જેથી નિવૃત્તિ સમયની આર્થિક સુરક્ષા જળવાઈ રહે. કોન્ટ્રાક્ટ કર્મચારીઓ માટે નિયમો અલગ છે, જેમાં પીએફ જમા કરાવવાની જવાબદારી મુખ્યત્વે કોન્ટ્રાક્ટર પર રહેશે.
કંપનીઓ માટે ફાઇલિંગ અને ફોર્મ-V સબમિશનના કડક નિયમોનું પાલન
નવી ઇપીએફ સ્કીમ 2026 ના સફળ સંચાલન માટે કંપનીઓ અને એમ્પ્લોયર્સ પર કાનૂની જવાબદારીઓ વધારવામાં આવી છે. દરેક કંપનીએ દર મહિને નિયમિત ફાઇલિંગ પ્રક્રિયા પૂર્ણ કરવી પડશે. નવી સ્કીમ અમલમાં આવ્યાના 15 દિવસની અંદર તમામ કંપનીઓએ 'Form-V' (ફોર્મ-V) માં કન્સોલિડેટેડ રિટર્ન ડિટેલ્સ સબમિટ કરવી ફરજિયાત રહેશે.
પીએફ ચોરી અટકશે અને હકનું નાણું સમયસર મળી જશે
આ ફોર્મમાં કંપનીમાં કામ કરતા તમામ કર્મચારીઓનો સચોટ રેકોર્ડ અને ડેટાબેઝ સામેલ હોવો જોઈએ. આ ડેટામાં કર્મચારીઓનું પાન કાર્ડ (PAN), યુનિવર્સલ એકાઉન્ટ નંબર (UAN), ગ્રોસ વેજ (કુલ પગાર) અને ઇપીએફ વેજની સચોટ વિગતો ડિજિટલ પોર્ટલ પર અપલોડ કરવાની રહેશે. આ પારદર્શક વ્યવસ્થાથી પીએફ ચોરી અટકશે અને શ્રમિકોને તેમના હકનું નાણું સમયસર મળશે.
આ પણ વાંચો : Gold Price Today : મુંબઈ અને કોલકાતામાં 22 કેરેટ સોનું ₹1,29,040 પર પહોંચ્યું,જાણો ગુજરાતમાં કેટલો છે ભાવ
