ઓટો સેટલમેન્ટની મર્યાદા વધીને 5 લાખ થઈ

EPFOએ PF ઉપાડના નિયમોમાં મોટો ફેરફાર કર્યો છે. પહેલા ઓટો સેટલમેન્ટ (Auto Settlement) ની મર્યાદા માત્ર 1 લાખ રૂપિયા હતી, જેને વધારીને હવે સીધી 5 લાખ રૂપિયા કરવામાં આવી છે. આ ઉપરાંત, પીએફ નિકાસી સાથે જોડાયેલા 13 જૂના અને અટપટા નિયમો નાબૂદ કરીને માત્ર 3 સરળ શ્રેણીઓ (જરૂરિયાત, મકાન અને વિશેષ પરિસ્થિતિ) નક્કી કરવામાં આવી છે. હવે સભ્યો તેમના કુલ PF બેલેન્સના 75 ટકા સુધીનો હિસ્સો સરળતાથી ઉપાડી શકે છે.

નવી પ્રણાલી હેઠળ ફોર્મ ભરતી વખતે જ ઓનલાઈન સિસ્ટમ જણાવી દેશે કે તમે કેટલા પૈસા ઉપાડી શકો છો. જો નક્કી કરેલી મર્યાદાથી વધુ રકમ ભરવામાં આવશે, તો તુરંત જ એલર્ટ (Alert) મળી જશે. ફોર્મમાં કોઈ ભૂલ હશે તો તેની માહિતી પહેલા જ મળી જશે, જેથી ક્લેમ રિજેક્ટ (Claim Reject) થવાનો ડર રહેશે નહીં. ક્લેમ સેટલ થતાં જ સેન્ટ્રલ પેમેન્ટ સિસ્ટમ સીધા બેંક ખાતામાં નાણાં મોકલી દેશે અને કોઈ ખામી હશે તો ઓનલાઈન જવાબ આપવાની સુવિધા પણ મળશે.

નોકરી બદલાતા જ ઓટોમેટિક PF ટ્રાન્સફર

ખાનગી ક્ષેત્ર (Private Sector) માં કામ કરતા કર્મચારીઓ માટે નોકરી બદલવી સામાન્ય બાબત છે, પરંતુ જૂની કંપનીમાંથી PF ટ્રાન્સફર કરવો હંમેશા મુશ્કેલ કામ રહ્યું છે. હવે નવી સિસ્ટમમાં નોકરી બદલતા જ PF આપમેળે નવી કંપનીના ખાતામાં ટ્રાન્સફર થઈ જશે. આ માટે કોઈ અલગ અરજી કરવી નહીં પડે કે કંપનીની મંજૂરીની રાહ જોવી પડશે નહીં. હવે દેશભરનો PF ડેટા એક જ કેન્દ્રીય ડેટાબેઝ (Central Database) માં સુરક્ષિત છે, જેનો મોટો ફાયદો એ છે કે તમે દેશની કોઈપણ EPFO ઓફિસમાંથી તમારું કામ કરાવી શકશો. એક જ પોર્ટલ પર PF બેલેન્સ, ક્લેમ સ્ટેટસ અને સર્વિસ રેકોર્ડ (Service Record) જેવી તમામ વિગતો એકસાથે જોવા મળશે.

15 જુલાઈ સુધીમાં ખાતામાં જમા થશે વ્યાજ

પૂરી પ્રક્રિયા ઓટોમેટેડ થવાને કારણે હવે વ્યાજ માટે ઓક્ટોબર-નવેમ્બર સુધી રાહ જોવી પડશે નહીં. 15 જુલાઈ સુધીમાં દેશના આશરે 34 કરોડ ખાતાઓમાં 8.25 ટકાના દરે વ્યાજ જમા (Interest Credit) થઈ જશે. આ નવી સિસ્ટમ દ્વારા લગભગ 1.44 લાખ કરોડ રૂપિયાનું વ્યાજ સીધું લોકોના ખાતામાં પહોંચશે. આ ઉપરાંત, હવે પીએફ સભ્યોને ક્લેમની અંતિમ મંજૂરીની તારીખ સુધી વ્યાજ મળશે, જેથી સભ્યોને વધારાનો આર્થિક નફો થશે.

પેન્શનધારકોને મળી મોટી રાહત

આ ડિજિટલ અપડેટનો સીધો લાભ ઇપીએસ (EPS) પેન્શનધારકોને પણ મળી રહ્યો છે. હવે પેન્શનર્સ દેશની કોઈપણ PF ઓફિસમાં જઈને પોતાનું લાઈફ સર્ટિફિકેટ (Life Certificate) જમા કરાવી શકશે. આ સિવાય, પેન્શન હવે દેશના કોઈપણ બેંક ખાતામાં સરળતાથી ટ્રાન્સફર થઈ શકશે. તમારું પીપીઓ (PPO) કઈ ઓફિસ સાથે લિંક છે, તેનાથી હવે કોઈ ફરક પડશે નહીં.

આ પણ વાંચો : EPF nomination rules: શું જીવનસાથીને નોમિની બનાવવું જરૂરી છે? EPF સ્કીમ 2026ના નવા નિયમો સમજો