વિદેશી પડકારો અને શોર્ટ-સેલર્સ પર ચેરમેન ગૌતમ અદાણીના આકરા પ્રહારો
અદાણી ગ્રુપની વાર્ષિક સામાન્ય સભામાં (AGM 2026) રોકાણકારોને સંબોધિત કરતી વખતે ગૌતમ અદાણીએ ભૂતકાળના તમામ વિવાદો પર પૂર્ણવિરામ મૂકતા આક્રમક વલણ અપનાવ્યું હતું. તેમણે જણાવ્યું હતું કે, જે વાવાઝોડા અમને અજમાવવા આવ્યા હતા, તેમણે જ અમારા પાયાના માળખાને વધુ લવચીક અને મજબૂત બનાવ્યું છે. પોતાની માતાના સંઘર્ષો અને શિખામણોને યાદ કરીને તેમણે ઉમેર્યું કે ખરી તાકાત દ્રઢતામાં રહેલી છે. સાહસ, ક્ષમતા પર વિશ્વાસ અને ઉદ્દેશ્ય પ્રત્યેની કટિબદ્ધતાના આધારે ગ્રુપે સાબિત કર્યું છે કે કોઈ પણ બાહ્ય પડકાર તેમની પાયાની વ્યવસ્થાને હચમચાવી શકે તેમ નથી.
રાષ્ટ્ર નિર્માતાઓ માટે રહેઠાણ અને સેન્ટ્રલાઇઝ્ડ મેગા ક્લાઉડ કિચનની સુવિધા
કંપનીના ગ્રોથમાં પરસેવો પાડતા કર્મચારીઓને ગૌતમ અદાણીએ 'રાષ્ટ્ર નિર્માતા' તરીકે નવાજ્યા હતા. આગામી પ્રોજેક્ટ્સ માટે ગ્રુપે નવી થ્રી-લેયર ઓર્ગેનાઇઝેશનલ રોજગાર નીતિની જાહેરાત કરી છે. આ નીતિ હેઠળ પ્રોજેક્ટ સાઇટ્સ પર સૌથી પહેલા સ્થાનિક સમુદાયના લોકોને, ત્યારબાદ રાજ્યના યુવાનોને અને છેલ્લે બહારના ઉમેદવારોને તક આપવામાં આવશે.
મુદ્રા અને ખાવડા જેવા અંતરિયાળ વિસ્તારોમાં કામ કરતા 50,000 શ્રમિકો માટે અત્યાધુનિક વાતાનુકૂલિત (એર-કન્ડિશન્ડ) આવાસ બનાવવામાં આવી રહ્યા છે. આ સાથે જ મુદ્રામાં એક સેન્ટ્રલાઇઝ્ડ ક્લાઉડ કિચન પણ સ્થાપિત કરાશે, જે દરરોજ 1,00,000 શ્રમિકોને પૌષ્ટિક ભોજન પૂરું પાડશે. વહીવટી પ્રક્રિયા ઝડપી બનાવવા માટે નવો અદાણી કોર્પોરેટ ગવર્નન્સ મોડેલ અમલી કરાયો છે, જેનાથી દિવસોનું કામ કલાકોમાં પૂરું થઈ શકશે.
અત્યાર સુધીનો સૌથી સર્વોચ્ચ એબિટડા અને મજબૂત નાણાકીય સ્થિતિના આંકડા
તમામ પ્રકારની આશંકાઓને ફગાવી દેતા ચેરમેને ગ્રુપના અત્યાર સુધીના સૌથી શાનદાર નાણાકીય પરિણામો જાહેર કર્યા હતા. નાણાકીય વર્ષ 2023-24 ના રિપોર્ટ અનુસાર, અદાણી ગ્રુપે 45 ટકાના અદભુત ગ્રોથ સાથે 82,917 કરોડ રૂપિયાનો અત્યાર સુધીનો સૌથી હાઇએસ્ટ એબિટડા (Adani Group Highest EBITDA) નોંધાવ્યો છે.
કંપનીનો ટેક્સ પછીનો ચોખ્ખો નફો (PAT) 71 ટકા વધીને રેકોર્ડ 40,129 કરોડ રૂપિયા પર પહોંચી ગયો છે. ગ્રુપની આર્થિક સુદ્રઢતા સાબિત કરતા તેમણે જણાવ્યું કે, કંપનીનો 'નેટ ડેટ-ટુ-એબિટડા' રેશિયો 3.3x થી ઘટીને 2.2x ના અત્યંત સુરક્ષિત સ્તરે આવી ગયો છે, જે વૈશ્વિક માનાંક પ્રમાણે ઉત્કૃષ્ટ છે (Adani Group Financial Growth).
ખાવડા રિન્યુએબલ પાર્ક અને પોર્ટ્સ ક્ષેત્રે સ્થાપિત થયેલા નવા ઐતિહાસિક કીર્તિમાન
ગુજરાતના સરહદી અને કઠિન ભૌગોલિક પરિસ્થિતિ ધરાવતા ખાવડા રણપ્રદેશમાં અદાણી ગ્રીન એનર્જી દ્વારા સ્થાપિત થઈ રહેલો વિશ્વનો સૌથી મોટો રિન્યુએબલ પાર્ક હાલમાં 3,000 મેગાવાટ ક્લીન એનર્જીનું ઉત્પાદન કરી રહ્યો છે. આગામી 5 વર્ષમાં આ ક્ષમતાને વધારીને 30 ગીગાવાટ સુધી લઈ જવાનો મેગા લક્ષ્યાંક છે.
બીજી તરફ, અદાણી પોર્ટ્સ એન્ડ સેઝ (APSEZ) માટે પણ આ વર્ષ ઐતિહાસિક રહ્યું છે, જ્યાં કુલ 420 એમએમટી (MMT) કાર્ગો હેન્ડલિંગનો નવો વિક્રમ સર્જાયો છે. ભારતની આત્મનિર્ભરતાને વેગ આપવા માટે કંપની 1 એમએમટીપીએ (MMTPA) ક્ષમતાનો કોપર સ્મેલ્ટર પ્લાન્ટ પણ તૈયાર કરી રહી છે, જે દેશની ઔદ્યોગિક કરોડરજ્જુને વધુ મજબૂત બનાવશે.
આ પણ વાંચો : Akasa Air IPO Update : ઇન્ડિગો-સ્પાઇસજેટને ટક્કર આપવા આકાસા એર લાવશે આઇપીઓ, જાણો ક્યારે થશે ઈશ્યૂ લોન્ચ
