સોનાના ભાવમાં મોટો ઉછાળો
ઓલ ઈન્ડિયા સરાફા એસોસિયેશન (All India Sarafa Association)ના જણાવ્યા અનુસાર, દિલ્હીમાં 99.9 ટકા શુદ્ધતાવાળા સોનાનો ભાવ ₹1,900 વધીને ₹1,54,400 પ્રતિ 10 ગ્રામ થયો હતો. ગુરુવારે સોનાનો ભાવ ₹1,52,500 હતો. સતત બીજા કારોબારી સત્રમાં સોનાની કિંમત વધી હતી. બે સત્રમાં સોનું કુલ ₹4,600 એટલે કે આશરે 3.07 ટકા મોંઘું થયું હતું.
ચાંદીના ભાવમાં ₹4,500નો વધારો
સોનાની સાથે ચાંદીમાં પણ જોરદાર તેજી જોવા મળી હતી. દિલ્હીના બજારમાં ચાંદીનો ભાવ ₹4,500 વધીને ₹2,28,500 પ્રતિ કિલોગ્રામ થયો હતો. ગુરુવારે ચાંદી ₹2,24,000 પ્રતિ કિલોગ્રામ હતી. આ પહેલાં ચાંદીના ભાવમાં ₹3,000નો ઘટાડો નોંધાયો હતો. જોકે, શુક્રવારની તેજીથી બજારનું ચિત્ર બદલાયું હતું.
કેમ મોંઘા થઈ રહ્યા છે સોના-ચાંદી?
નિષ્ણાતોના મતે અમેરિકન ડોલરમાં આવેલી નબળાઈ કિંમતી ધાતુઓમાં તેજીનું મુખ્ય કારણ છે. ડોલર નબળો પડતાં આંતરરાષ્ટ્રીય રોકાણકારોનું આકર્ષણ સોના તરફ વધી શકે છે. બીજી તરફ ભારતીય રૂપિયામાં નબળાઈને કારણે આયાતી સોના-ચાંદીનો ખર્ચ વધે છે, જેની અસર સ્થાનિક બજારમાં જોવા મળે છે.
આંતરરાષ્ટ્રીય બજારમાં પણ તેજી
વૈશ્વિક બજારમાં સ્પોટ ગોલ્ડ (Spot Gold) 1.17 ટકા વધીને 4,181.98 ડોલર પ્રતિ ઔંસ પહોંચ્યું હતું. જ્યારે ચાંદીનો ભાવ લગભગ બે ટકા વધીને 60.32 ડોલર પ્રતિ ઔંસ થયો હતો. ત્રણ મહિનાની નીચી સપાટીએ પહોંચ્યા બાદ ચાંદીમાં સુધારો નોંધાયો હતો.
ખરીદદારો માટે શું મહત્વનું? (Gold Buying Guide)
સોના-ચાંદીના ભાવમાં સતત વધઘટને કારણે ખરીદદારો માટે બજારના તાજા દર જાણવું જરૂરી બન્યું છે. ખાસ કરીને તહેવારો અને લગ્નની ખરીદી પહેલાં સ્થાનિક જ્વેલર્સ પાસેથી ભાવ, શુદ્ધતા અને મેકિંગ ચાર્જની માહિતી મેળવવી હિતાવહ છે.
આ પણ વાંચો : Surat: ઓલપાડમાં રાજકીય ભૂકંપ! સરપંચ-ડેપ્યુટી સરપંચ વચ્ચે જંગ, આખરે કોની ખુરશી ગઈ?