વીડિયો રેકોર્ડિંગ યુટ્યુબ પ્લેટફોર્મ પર થતું નથી

કંપનીએ કોર્ટમાં સ્પષ્ટતા કરી છે કે કોર્ટની કાર્યવાહીનું વીડિયો રેકોર્ડિંગ યુટ્યુબ પર નથી થતું, પરંતુ બહારના અન્ય સાધનો દ્વારા કરવામાં આવે છે. આથી, યુટ્યુબ માટે એ નક્કી કરવું મુશ્કેલ છે કે કયા વીડિયોમાં કોર્ટની કાર્યવાહી દર્શાવવામાં આવી છે, તેના માટે યોગ્ય મંજૂરી (Permission) લેવાઈ હતી કે નહીં, અથવા તે વીડિયો કોઈ કાયદાનું ઉલ્લંઘન (Violation) કરે છે કે નહીં. ભારતમાં દરેક અદાલતના નિયમો અલગ-અલગ છે. વળી, યુટ્યુબ પર દર કલાકે લાખો વીડિયો અપલોડ થાય છે. આટલી મોટી માત્રામાં સામગ્રી આવતી હોવાથી, પ્લેટફોર્મનું અગાઉથી મોનિટરિંગ (Monitoring) કરીને ગેરકાયદે વીડિયોને અપલોડ થતા રોકવા માટે ગૂગલ સક્ષમ નથી.

દરેક વીડિયો આપમેળે હટાવવો સંભવ નથી

ગૂગલના જણાવ્યા અનુસાર, પ્રવર્તમાન કાયદા હેઠળ કંપનીની જવાબદારી માત્ર એ જ વીડિયોને હટાવવાની છે, જેને કોર્ટ દ્વારા ચોક્કસ URL (યુનિફોર્મ રિસોર્સ લોકેટર) સાથે કાયદા વિરુદ્ધ જાહેર કરવામાં આવ્યા હોય. ભારતીય કાયદો સોશિયલ મીડિયા કંપનીઓ પાસેથી એવી અપેક્ષા નથી રાખતો કે તેઓ પોતે જ કોઈ ત્રીજી વ્યક્તિ (Third Party) દ્વારા અપલોડ કરાયેલા કન્ટેન્ટની યોગ્યતા નક્કી કરે. કન્ટેન્ટ સાચું છે કે ખોટું, તેનો અંતિમ નિર્ણય લેવાનો અધિકાર માત્ર સક્ષમ અદાલત (Competent Court) પાસે જ છે.

શું હતો સમગ્ર વિવાદ?

આ સમગ્ર વિવાદ આમ આદમી પાર્ટી (AAP) ના સુપ્રીમો અરવિંદ કેજરીવાલ સાથે જોડાયેલો છે. દારૂ કૌભાંડ (Excise Policy Case) મામલે ટ્રાયલ કોર્ટના નિર્ણયને તપાસ એજન્સીએ હાઈકોર્ટમાં પડકાર્યો હતો. આ કેસની સુનાવણી જસ્ટિસ સ્વર્ણકાંતા શર્માની કોર્ટમાં ચાલી રહી હતી, જેમાંથી અલગ થવા માટે કેજરીવાલે માંગ કરી હતી. આ સુનાવણી દરમિયાન કેજરીવાલે આપેલા નિવેદનનો વીડિયો કોર્ટની પરવાનગી વગર સોશિયલ મીડિયા પર વાયરલ (Viral) થઈ ગયો હતો. આ ઘટના બાદ વકીલ વૈભવ સિંહે હાઈકોર્ટમાં એક અરજી (Petition) દાખલ કરીને માંગ કરી હતી કે કોર્ટ સોશિયલ મીડિયા કંપનીઓને કડક આદેશ આપે જેથી ભવિષ્યમાં કોર્ટની મંજૂરી વગરનું ડિજિટલ રેકોર્ડિંગ ફરી ક્યારેય અપલોડ ન થઈ શકે. જેના જવાબમાં ગૂગલે આ સોગંદનામું રજૂ કર્યું છે.

આ પણ વાંચો : Mobile Tariff Hike : ખિસ્સા ખાલી કરવા તૈયાર રહો! આગામી 3 થી 4 મહિનામાં મોબાઈલ બિલમાં થઇ શકે છે તોતિંગ ભાવવધારો