અમેરિકા અને ચીનમાં નિકાસ કેટલી વધી?
વાણિજ્ય મંત્રાલય (Commerce Ministry)ના જણાવ્યા અનુસાર, જુલાઈમાં અમેરિકામાં ભારતની નિકાસ 12.85 ટકા વધીને 9.02 અબજ ડોલર થઈ છે. બીજી તરફ, ચીનમાં ભારતીય માલની નિકાસ 64.57 ટકા વધીને 2.2 અબજ ડોલર સુધી પહોંચી છે. ચીન સાથે સરહદી તણાવ અને દેશમાં ‘મેક ઇન ઇન્ડિયા’ (Make in India)ને પ્રોત્સાહન વચ્ચે ચીની બજારમાં ભારતીય ઉત્પાદનોની માંગમાં થયેલો આ વધારો ખાસ નોંધપાત્ર છે. જોકે, આ સમયગાળા દરમિયાન બંને દેશોમાંથી ભારતની આયાત (Imports) પણ વધી છે. ચીનમાંથી આયાત 34.42 ટકા વધીને 14.67 અબજ ડોલર, જ્યારે અમેરિકામાંથી આયાત 18.11 ટકા વધીને 5.5 અબજ ડોલર થઈ છે.
એપ્રિલથી જુલાઈ દરમિયાન શું રહ્યું ચિત્ર?
નાણાકીય વર્ષ 2026-27ના એપ્રિલથી જુલાઈ દરમિયાન અમેરિકામાં ભારતની નિકાસ 3 ટકા વધીને 34.5 અબજ ડોલર થઈ છે. આ સમયગાળામાં અમેરિકામાંથી આયાત 22.42 ટકા વધીને 22.12 અબજ ડોલર રહી. ચીનની વાત કરીએ તો એપ્રિલ-જુલાઈ દરમિયાન ચીનમાં ભારતની નિકાસ 35.97 ટકા વધીને 7.78 અબજ ડોલર થઈ છે. જોકે, ચીનમાંથી આયાત 29.68 ટકા વધીને 52.71 અબજ ડોલર થઈ છે. એટલે ચીન સાથેના વેપાર (Trade)માં ભારતની આયાત હજુ પણ નિકાસ કરતાં ઘણી વધારે છે.
અમેરિકા સાથે ટૅરિફ મુદ્દે ચર્ચા
ભારત અને અમેરિકા વચ્ચે વેપાર કરાર (Trade Agreement)ને લઈને વાતચીત ચાલી રહી છે. આ દરમિયાન અમેરિકાએ 24 જુલાઈથી ભારત પર વધારાનો 10 ટકા ટૅરિફ (Tariff) લાગુ કર્યો છે. તેમ છતાં જુલાઈમાં અમેરિકામાં ભારતની નિકાસમાં નોંધપાત્ર વૃદ્ધિ જોવા મળી છે.
સિંગાપોરમાં પણ ભારતીય નિકાસનો જોરદાર ઉછાળો
ભારતના નિકાસ ક્ષેત્રની વૃદ્ધિ માત્ર અમેરિકા અને ચીન પૂરતી મર્યાદિત નથી. જુલાઈમાં સિંગાપોર (Singapore)માં ભારતની નિકાસ વાર્ષિક ધોરણે 83.7 ટકા વધીને 1.6 અબજ ડોલર થઈ છે. નાણાકીય વર્ષના પ્રથમ 4 મહિનામાં સિંગાપોરમાં નિકાસ 97.11 ટકા વધીને 8.1 અબજ ડોલર પહોંચી છે. આ સમયગાળા દરમિયાન UAE, નેધરલેન્ડ, જર્મની, દક્ષિણ આફ્રિકા, તાન્ઝાનિયા, ઓસ્ટ્રેલિયા, મલેશિયા, શ્રીલંકા, ઇટાલી અને વિયેતનામમાં પણ ભારતની નિકાસમાં સકારાત્મક વૃદ્ધિ નોંધાઈ છે.
કેટલાક દેશોમાં નિકાસ ઘટી, આયાત વધી
જુલાઈમાં UK, બાંગ્લાદેશ, સાઉદી અરેબિયા અને નેપાળમાં ભારતની નિકાસમાં ઘટાડો નોંધાયો. બીજી તરફ રશિયા, કોરિયા, સિંગાપોર, જર્મની, ઓમાન, મલેશિયા, તાઇવાન અને બ્રાઝિલમાંથી આયાત વધી છે. જૂનમાં ઓમાનમાંથી આયાત 150.36 ટકા વધીને 1.57 અબજ ડોલર, તાઇવાનમાંથી 111.3 ટકા વધીને 1.62 અબજ ડોલર અને બ્રાઝિલમાંથી 146.73 ટકા વધીને 1.4 અબજ ડોલર થઈ હતી. આ આંકડા દર્શાવે છે કે વૈશ્વિક પડકારો વચ્ચે ભારત અનેક મહત્વના આંતરરાષ્ટ્રીય બજારોમાં પોતાની નિકાસની પહોંચ સતત મજબૂત બનાવી રહ્યું છે.
આ પણ વાંચો : Plastic Notes in India : તમારા ખિસ્સા સુધી પહોંચવા તૈયાર છે નવું 'પ્લાસ્ટિક મની'! જાણો સરકારની તૈયારી, જૂના નોટનું શું થશે?
