Jewels of Gujarat: જન્મ, બાળપણ અને વતન છોડવાનો કપરો સંઘર્ષ
કાંતિલાલ જમનાદાસનો જન્મ 1940 ના દાયકાના મધ્યમાં આફ્રિકાના મોઝામ્બિક દેશમાં થયો હતો. તેમનું બાળપણ ત્યાં ખૂબ જ સુખદ વીત્યું હતું. તેઓ બાળપણથી જ ખૂબ જ જિજ્ઞાસુ અને બુદ્ધિશાળી હતા. તેમણે માત્ર 12 વર્ષની નાની ઉંમરે પોતાના પિતા સાથે કામ કરવાનું શરૂ કરી દીધું હતું. જોકે, ભારતીય સેનાએ ગોવાને મુક્ત કરાવ્યા બાદ મોઝામ્બિકમાં સ્થિતિ બદલાઈ ગઈ હતી. તેમનો પરિવાર તે 2000 ભારતીયોમાં સામેલ હતો જેમને બધું જ છોડીને ભારત પરત ફરવું પડ્યું હતું. ત્યારબાદ 1974 માં પોર્ટુગીઝ ક્રાંતિ સમયે મોઝામ્બિક આઝાદ થતાં મોટો હિન્દુ સમુદાય પોર્ટુગલ તરફ સ્થળાંતરિત થયો હતો.
Jewels of Gujarat: પોર્ટુગલમાં નવી શરૂઆત અને ડેનકેક કંપનીની સ્થાપના
જ્યારે તેઓ પોર્ટુગલ પહોંચ્યા ત્યારે તદ્દન નવો વાતાવરણ, સંસ્કૃતિ અને ખોરાક વચ્ચે ઘણો સંઘર્ષ કરવો પડ્યો હતો. તેમણે ત્યાં ફૂડ ઇન્ડસ્ટ્રીમાં કામ કરવાનું શરૂ કર્યું હતું. તેમણે ઓક્ટોબર 1978 માં ડેનકેક (DanCake) કંપનીનો પાયો નાખ્યો હતો. આ કંપની બેકરી અને કન્ફેક્શનરી આઈટમ્સનું વેચાણ કરતી હતી. ટૂંક સમયમાં જ તે 1980 ના દાયકામાં પોર્ટુગલની અગ્રણી પેસ્ટ્રી ઉત્પાદક કંપની બની ગઈ હતી. તેમણે શરૂઆતમાં પડતર કિંમત કરતાં પણ ઓછા ભાવે વિદેશમાં ઉત્પાદનો વેચીને બજારમાં પગભર થવાની સફળ રણનીતિ અપનાવી હતી. વર્ષ 2013 માં તેમની કંપનીએ ઓબિડોસમાં વિશ્વની સૌથી મોટી ચોકલેટ પાઈ બનાવીને રેકોર્ડ સર્જ્યો હતો. છેલ્લા 40 વર્ષથી આ કંપની ગુણવત્તાયુક્ત બિસ્કિટ, ટોસ્ટ અને કેકનું ઉત્પાદન કરે છે.
હિન્દુ સમુદાયના અધિકારો માટે લડત અને રાષ્ટ્રીય સન્માન
પોર્ટુગલમાં રહેતા એક હિન્દુ ગુજરાતી તરીકે તેમણે શરૂઆતમાં ધાર્મિક સુવિધાઓનો મોટો અભાવ અનુભવ્યો હતો. તે સમયે ત્યાં અંતિમ સંસ્કાર જેવા મૂળભૂત હિન્દુ ધાર્મિક સંસ્કારો માટે પરવાનગી નહોતી. આ સમસ્યાના ઉકેલ માટે વર્ષ 1976 માં પોર્ટુગલના હિન્દુ સમુદાયની સ્થાપના કરવામાં આવી, જેના તેઓ પ્રમુખ બન્યા હતા. તેમણે સતત પ્રયાસો કરીને હિન્દુઓના અધિકારો મેળવ્યા અને લિસ્બનમાં 1990 ના દાયકાના અંતમાં એક ભવ્ય હિન્દુ મંદિરનું નિર્માણ કરાવ્યું હતું. તેમના આ ઔદ્યોગિક અને સામાજિક યોગદાન બદલ પોર્ટુગલના રાષ્ટ્રપતિ મહામહિમ માર્સેલો રેબેલો ડી સોસાએ તેમને પ્રતિષ્ઠિત રાષ્ટ્રીય સન્માન 'ઇન્સિગ્નિયા ઓફ ગ્રાન્ડ ઓફિસર ઓફ ઇન્ડસ્ટ્રિયલ મેરિટ' (ComSE, GCIH) થી નવાજ્યા છે.
આ પણ વાંચો--- Jewels of Gujarat: સામાન્ય શરૂઆતથી વિશ્વસ્તરીય સામ્રાજ્ય સુધી, શેઠ કનકસી ખીમજીનું જીવનચરિત્ર
