Jewels of Gujarat: પ્રારંભિક જીવન અને પારિવાર
કિશોર છીતાનો જન્મ 1953માં નવસારીના સતેર ગામમાં માતા મણીબેન અને પિતા ભુલાભાઈ છીતાને ત્યાં થયો હતો. બાળપણમાં તેઓ અત્યંત સાદગીપૂર્ણ વાતાવરણમાં ઉછર્યા હતા. તેમના પૂર્વજો ગરીબી હોવા છતાં એકતા અને પ્રમાણિકતા સાથે જીવતા હતા, જેમના જીવનમાંથી કિશોરભાઈએ પ્રેમ, વિશ્વાસ અને માનવતાના પાઠ શીખ્યા હતા. નાનપણમાં તેઓ પોતાની દાદી અને માતા સાથે ખેતરોમાં કામ કરવા જતા હતા, જ્યાં તેમણે કઠિન પરિશ્રમનું મહત્વ સમજ્યું હતું.
Jewels of Gujarat: શિક્ષણ અને વિદેશ ગમન
તેમનો શિક્ષણનો પ્રવાસ નવસારીથી શરૂ થઈ લંડન અને ત્યારબાદ ન્યૂયોર્ક સુધી પહોંચ્યો હતો. ન્યૂયોર્કમાં તેઓ તેમના કાકાના ઘરે રહેતા હતા. તે સમય દરમિયાન તેમણે રોચેસ્ટરની પ્રિન્ટિંગ સ્કૂલમાંથી પ્રિન્ટિંગની કળામાં માસ્ટરી મેળવી હતી. શિક્ષણની સાથે આર્થિક સ્થિરતા માટે તેમણે પાર્ટ-ટાઇમ કામ પણ કર્યું હતું. અભ્યાસ પૂર્ણ કર્યા બાદ, તેઓ જોહાનિસબર્ગ પરત ફર્યા અને ગોલ્ડન એરા ગ્રુપની જવાબદારી સ્વીકારી હતી.
બિઝનેસમાં સિદ્ધિ
કિશોર છીતા હાલમાં સાઉથ આફ્રિકાના જર્મિસ્ટન સ્થિત 'પાવર સ્ટ્રીટ'માં આવેલા ગોલ્ડન એરા ગ્રુપ (Pty) લિમિટેડના જોઈન્ટ CEO તરીકે ફરજ બજાવે છે. વ્યવસાયની સાથે તેમણે પોતાની ટીમના માનસિક સ્વાસ્થ્યનું પણ ધ્યાન રાખ્યું છે. તેમણે તેમની વિવિધ ફેક્ટરીઓમાં કેન્ટીન જેવી સુવિધાઓ અને કર્મચારીઓને તાજગી મળે તે માટે રમતોનું આયોજન પણ કર્યું છે.
વ્યક્તિગત જીવન અને કૌટુંબિક મૂલ્યો
કિશોરભાઈનું માનવું છે કે સુખી પરિવાર જ જીવનની સાચી મૂડી છે. તેમની પત્ની હેમુબેન તેમના તમામ ઉતાર-ચઢાવમાં તેમની સાથે રહ્યા છે અને તેમના જીવનમાં અડધા ભાગ કરતાં પણ વધુ યોગદાન આપ્યું છે. તેમને કુલ પાંચ પુત્રીઓ છે: કલ્પના, આશા, ઉમા, તુલસી અને રાધા. હાલમાં કલ્પના, આશા, તુલસી અને ઉમા તેમના પારિવારિક બિઝનેસને આગળ વધારી રહ્યા છે, જ્યારે રાધાએ તાજેતરમાં જ CA પૂર્ણ કર્યું છે અને પોતાની આર્ટિકલશિપ કરી રહી છે. કિશોરભાઈ અત્યારે પાંચ પૌત્રોના દાદા તરીકે પણ આનંદમય જીવન ગાળી રહ્યા છે.
સમાજ પ્રત્યેનું યોગદાન
તેઓ પોતાના માતા-પિતાના વારસાને આગળ ધપાવતા, પરિવાર સાથે મળીને વિવિધ ધાર્મિક સંસ્થાઓમાં સહયોગ આપે છે અને યજ્ઞ જેવા કાર્યક્રમોનું આયોજન પણ કરે છે, જેમાં વિવિધ જાતિના લોકો સહભાગી બને છે. યુવાનો માટે તેમનો સંદેશ છે કે પોતાના સપનાઓનો પીછો કરો, તેને સફળ બનાવો, પરંતુ ક્યારેય માતા-પિતાના આશીર્વાદ લેવાનું ચૂકશો નહીં.
આ પણ વાંચો--- Jewels of Gujarat: સૌરાષ્ટ્રથી ફિજી સુધી, કાંતિ લાલ ટપ્પૂનું ગૌરવશાળી વેપાર સામ્રાજ્ય
