Share Market : આજે ભારતીય શેરબજાર નબળા વૈશ્વિક સંકેતો અને મધ્ય પૂર્વમાં વધતા ભૌગોલિક-રાજકીય તણાવ કડડભૂસ થયું છે. ઈરાન-યુએસ વચ્ચેના લશ્કરી ઘર્ષણની સીધી અસર રોકાણકારોના સેન્ટિમેન્ટ પર જોવા મળી રહી છે, જેને પગલે બજારમાં ભારે વેચવાલીનું વાતાવરણ છે.
Share Market : બજારની સ્થિતિ અને મુખ્ય આંકડા
BSE સેન્સેક્સ 364 પોઈન્ટના ઘટાડા સાથે 77,816 ના સ્તરે ખુલ્યો હતો, જ્યારે NSE નિફ્ટી 50 (NSE Nifty 50) 139 પોઈન્ટ ઘટીને 24,259 પર કારોબારની શરૂઆત કરી હતી. આજના ટ્રેડિંગમાં આઈટી સેક્ટર (IT Sector) માં થોડી રાહત જોવા મળી છે; ખાસ કરીને ઇન્ફોસિસ અને ટીસીએસના શેર તેજીમાં રહ્યા છે. જોકે, ટ્રેન્ટ લિમિટેડ 12.44% ના મોટા ઘટાડા સાથે ટોચના લુઝર્સની યાદીમાં છે. અદાણી એન્ટરપ્રાઇઝ, રિલાયન્સ ઇન્ડસ્ટ્રીઝ અને અદાણી પોર્ટ્સ પર પણ વેચવાલીનું દબાણ સ્પષ્ટ દેખાઈ રહ્યું છે.
વૈશ્વિક પરિબળોની અસર
મધ્ય પૂર્વમાં તણાવને કારણે આંતરરાષ્ટ્રીય સ્તરે ક્રૂડ ઓઈલ (Crude Oil) ના ભાવ આસમાને પહોંચ્યા છે. છેલ્લા બે દિવસમાં જ ક્રૂડ ઓઈલમાં 5% થી વધુનો ઉછાળો આવ્યો છે, જેમાં બ્રેન્ટ ક્રૂડ $76.04 પ્રતિ બેરલ પર ટ્રેડ કરી રહ્યું છે. અમેરિકી બજારો પણ નબળા બંધ થયા હતા, જેમાં ડાઉ જોન્સ અને S&P 500 માં ઘટાડો જોવા મળ્યો હતો. માઈક્રોન અને એનવીડિયા જેવી મોટી સેમિકન્ડક્ટર કંપનીઓના શેરમાં ભારે વેચવાલીએ પણ રોકાણકારોની ચિંતા વધારી છે.
હાલની સ્થિતિ જોતા, એશિયન બજારો પણ દબાણ હેઠળ છે. જાપાનના નિક્કી ૨૨૫ અને હોંગકોંગના હેંગ સેંગ ઇન્ડેક્સમાં પણ ઘટાડો નોંધાયો છે. આગામી દિવસોમાં મધ્ય પૂર્વની સ્થિતિ અને વૈશ્વિક ફુગાવાના આંકડા બજારની દિશા નક્કી કરશે.
આ પણ વાંચો : Adani Kutch Copper LME : અદાણીના તાંબાને મળ્યું લંડન મેટલ એક્સચેન્જનું ગ્લોબલ સર્ટિફિકેટ, વૈશ્વિક બજારમાં ભારતનો મોટો દબદબો
