કૂકાવટી ગામે ટેન્કર નદીમાં તણાયું
નસવાડી તાલુકાના કૂકાવટી ગામ નજીક અશ્વિની નદીમાં અચાનક પાણીનો પ્રવાહ વધી જતાં પસાર થતું ટેન્કર પાણીમાં તણાઈ ગયું છે. સ્થાનિક લોકો દ્વારા બનાવવામાં આવેલા વીડિયો સોશિયલ મીડિયામાં વાયરલ થતાં ઘટનાએ ભારે ચર્ચા જગાવી છે. સદનસીબે જાનહાનિ થઈ હોવાની માહિતી સામે આવી નથી.
બે કલાકમાં 1 થી 3 ઇંચ વરસાદ
જિલ્લાના અનેક વિસ્તારોમાં ભારે વરસાદ નોંધાયો છે. પાવી જેતપુરમાં 3 ઇંચ, જ્યારે ક્વાંટ અને નસવાડીમાં અંદાજે અઢી ઇંચ વરસાદ પડ્યો છે. ટૂંકા સમયમાં પડેલા ભારે વરસાદના કારણે નદીઓ અને નાળાઓમાં પાણીનો પ્રવાહ ઝડપથી વધી ગયો છે.
હિરણ નદીમાં ઘોડાપૂર, રબર ડેમ છલકાયો
છોટાઉદેપુર જિલ્લાની બીજી સૌથી મોટી ગણાતી હિરણ નદીમાં ભારે ઘોડાપૂર આવ્યું છે. નદીમાં પાણીની આવક વધતા રાજવાસણા રબર ડેમ છલકાઈ ગયો છે. ડેમ ઉપરથી પાણી વહી રહ્યું હોવાથી સમગ્ર વિસ્તાર દરિયા જેવો દેખાઈ રહ્યો છે.
દરગાહ પાસે યુવક ફસાયો, NDRF એ બચાવ્યો
હિરણ નદીમાં આવેલા ઘોડાપૂર દરમિયાન દરગાહ પાસે એક યુવક પાણીના પ્રવાહમાં ફસાઈ ગયો હતો. વાલપુર ગામનો આ યુવક પાણીના વધતા પ્રવાહ વચ્ચે મદદ માટે બુમો પાડી રહ્યો હતો. ઘટનાની જાણ થતાં NDRFની ટીમ તાત્કાલિક સ્થળ પર પહોંચી અને સફળ રેસ્ક્યુ ઓપરેશન કરીને યુવકને સલામત બહાર કાઢ્યો છે.
![chhotaudepur rain_gujaratfirst 22]()
ઓરસંગ અને અશ્વિની નદી બેકાબૂ
નસવાડી તાલુકામાં અશ્વિની નદી બેકાબૂ બની ગઈ છે. જલારામ મંદિર વિસ્તાર સહિત અનેક વિસ્તારોમાં ગળાડૂબ પાણી ભરાઈ ગયા છે. ગામોમાં પાણી ઘૂસતાં લોકો મુશ્કેલીમાં મુકાયા છે અને અનેક વિસ્તારોમાં જનજીવન સંપૂર્ણપણે ખોરવાઈ ગયું છે. ઓરસંગ નદી પણ ફરી બે કાંઠે વહી રહી છે. નગરપાલિકાનો ચેક ડેમ બીજી વાર છલકાઈ ગયો છે.
![chhotaudepur rain_gujaratfirst 111]()
ખેતરોમાં પાણી ભરાતા પાકને ખતરો
સંખેડાના વાસણા ગામે ખેતરોમાં મોટા પ્રમાણમાં પાણી ભરાઈ ગયા છે. પાણીનો નિકાલ ન થતાં ખેતરો ટાપુ જેવા બની ગયા છે. ખેડૂતોમાં ઉભા પાકને ભારે નુકસાન થવાની ભીતિ વ્યક્ત કરવામાં આવી રહી છે.
કાલીડોળીમાં ઘરોમાં પાણી ઘૂસ્યાં
નસવાડી તાલુકાના કાલીડોળી ગામના અમદાવાદી ફળિયામાં વરસાદી પાણી ઘૂસી જતાં નદી વહેતી હોય તેવા દ્રશ્યો સર્જાયા છે. કોતરના પાણી ગામમાં ઘૂસતાં રહીશો મુશ્કેલીમાં મુકાયા છે. અનેક ઘરોમાં પાણી પ્રવેશતાં ઘરવખરીને પણ મોટાપાયે નુકસાન પહોંચ્યું હોવાનું સ્થાનિકોએ જણાવ્યું છે.
આ પણ વાંચોઃ Anand Heavy Rain: આણંદમાં ભારે વરસાદનો કહેર, SP કચેરી બહાર પાણીમાં બાળક તણાયું
આ પણ વાંચોઃ Bhavnagar: દરિયાકાંઠે ફરવાનો પ્લાન હોય તો ચેતી જજો, ભાવનગરમાં લાગુ થયો પ્રતિબંધ
