Aaron Summers Cricketer Convicted: ગુનો સ્વીકાર્યો અને જામીન રદ થયા
30 વર્ષીય એરોન સમર્સ બિગ બેશ લીગ (BBL) માં હોબાર્ટ હરિકેન્સ અને સ્થાનિક ક્રિકેટમાં તસ્માનિયાની ટીમ તરફથી રમી ચૂક્યો છે. જૂનના અંતમાં સમર્સે કોર્ટમાં પોતાનું વલણ બદલીને ત્રણ ગંભીર આરોપો સ્વીકારી લીધા હતા. આ ગુનાઓમાં સગીરા સાથે યૌન શોષણના 2 આરોપો અને અશ્લીલ સામગ્રી બતાવવાના ઈરાદાથી ગ્રૂમિંગનો 1 આરોપ સામેલ છે. ન્યાયાધીશ હેલેન વૂડે આ મામલે કોઈ પણ પ્રકારની રાહત આપવાનો સ્પષ્ટ ઇનકાર કરી દીધો હતો. ત્યારબાદ અદાલતે ક્રિકેટરના જામીન રદ કરીને તેને ન્યાયિક કસ્ટડીમાં જેલ ભેગો કરી દીધો છે. તસ્માનિયાની સર્વોચ્ચ અદાલત ઓગસ્ટ મહિનામાં આ કેસમાં અંતિમ સજા સંભળાવશે.
Aaron Summers Cricketer Convicted: સોશિયલ મીડિયાથી સંપર્ક
કોર્ટના દસ્તાવેજો અનુસાર આ સમગ્ર મામલો વર્ષ 2018 નો છે. તે સમયે એરોન સમર્સ હોબાર્ટ હરિકેન્સ ટીમનો મહત્વનો ભાગ હતો. આરોપ છે કે તેણે સોશિયલ મીડિયાના માધ્યમથી એક સગીર પીડિતા સાથે સંપર્ક સાધ્યો હતો અને પાછળથી તેનું યૌન શોષણ કર્યું હતું. સમર્સના વકીલ કેરોલિન ગ્રેવ્સે બચાવમાં જણાવ્યું હતું કે ઘટના સમયે તેમનો અસીલ ખૂબ જ મુશ્કેલ માનસિક સ્થિતિમાંથી પસાર થઈ રહ્યો હતો. તે સામાજિક રીતે એકલો પડી ગયો હતો અને પોતાનો મોટાભાગનો સમય સોશિયલ મીડિયા પર વિતાવતો હતો. જો કે, આ દલીલો કોર્ટમાં તેને બચાવી શકી નથી.
ભૂતકાળમાં પણ જેલની સજા કાપી ચૂક્યો છે
એરોન સમર્સનો આ કોઈ પ્રથમ ગુનાહિત ઈતિહાસ નથી. આ પહેલા વર્ષ 2021 માં પણ તે સગીરોની અશ્લીલ સામગ્રી રાખવા અને તેને શેર કરવાના અલગ કેસમાં દોષિત જાહેર થયો હતો. તે સમયે પણ તેને જેલની સજા ભોગવવી પડી હતી. આ બીજી વખત છે જ્યારે તે બાળ યૌન શોષણ સાથે જોડાયેલા ગુનામાં દોષિત સાબિત થયો છે. વકીલના જણાવ્યા અનુસાર આ ઘટના બાદ હવે ઓસ્ટ્રેલિયા કે દુનિયામાં ક્યાંય પણ પ્રોફેશનલ ક્રિકેટ રમવાનું તેનું સપનું હંમેશા માટે રોળાઈ ગયું છે.
આવું રહ્યું છે એરોન સમર્સનું ક્રિકેટ કરિયર
એરોન સમર્સને એક સમયે ઓસ્ટ્રેલિયન ક્રિકેટનું ભવિષ્ય માનવામાં આવતો હતો. જમણા હાથના આ ફાસ્ટ બોલરે પોતાના કરિયરમાં 7 લિસ્ટ-A મેચ અને 3 ટી20 મેચ રમી છે. લિસ્ટ-A મેચોમાં સમર્સે 77.00 ની એવરેજથી માત્ર 5 વિકેટ ઝડપી છે. જ્યારે ટી20 ક્રિકેટ ફોર્મેટમાં તેને એક પણ વિકેટ મળી શકી નથી. પોતાની ઝડપના કારણે ચર્ચામાં આવેલા આ ખેલાડીનો અંત હવે જેલની અંધારી કોટડીમાં થશે તે નિશ્ચિત થઈ ગયું છે.
આ પણ વાંચો---- Ahmedabad: રાષ્ટ્રીય પેરા કિક બોક્સિંગ ચેમ્પિયનશિપનું આયોજન, સમગ્ર દેશમાંથી 150 જેટલા પેરા ખેલાડી લેશે ભાગ
