શું છે સમગ્ર મામલો?

આ સમગ્ર કેસ 2025માં યોજાયેલી અબુ ધાબી T10 લીગ (Abu Dhabi T10 League) સાથે જોડાયેલો છે. આ ટૂર્નામેન્ટ દરમિયાન એમિરેટ્સ ક્રિકેટ બોર્ડ (ECB)એ ભ્રષ્ટાચાર વિરોધી દેખરેખની જવાબદારી ICCને સોંપી હતી. તપાસ દરમિયાન જાણવા મળ્યું કે બોડુગુમ અખિલેશ રેડ્ડીએ મેચના પરિણામ અને રમતની દિશા પર ગેરકાયદેસર રીતે અસર કરવાનો પ્રયાસ કર્યો હતો. ICCની એન્ટી-કરપ્શન ટ્રિબ્યુનલ (Anti-Corruption Tribunal)એ તેમને ભ્રષ્ટાચાર વિરોધી સંહિતાના 3 ગંભીર ઉલ્લંઘનો માટે દોષિત જાહેર કર્યા.

કયા નિયમોનો ભંગ થયો?

ICCના જણાવ્યા અનુસાર અખિલેશ રેડ્ડી સામે માત્ર મેચને પ્રભાવિત કરવાનો પ્રયાસ કરવાનો જ નહીં, પરંતુ અન્ય ખેલાડીને પણ મેચ ફિક્સિંગમાં સામેલ થવા માટે પ્રેરિત કરવાનો આરોપ સાબિત થયો હતો. તપાસ દરમિયાન વધુ એક ગંભીર બાબત સામે આવી હતી. ટ્રિબ્યુનલના જણાવ્યા મુજબ રેડ્ડીએ પોતાના મોબાઇલ ફોનમાંથી મહત્વપૂર્ણ ચેટ અને ડિજિટલ ડેટા ડિલીટ કરી દીધા હતા, જેથી તપાસ એજન્સીને પુરાવા ન મળી શકે. પુરાવા નષ્ટ કરવાનો પ્રયાસ પણ ICCના નિયમો હેઠળ ગંભીર ગુનો ગણાય છે.

પ્રતિબંધ ક્યારથી અમલમાં?

ICCએ સ્પષ્ટ કર્યું છે કે 8 વર્ષનો પ્રતિબંધ 21 નવેમ્બર, 2025થી અમલમાં ગણાશે. આ જ દિવસે અખિલેશ રેડ્ડીને પ્રાથમિક રીતે સસ્પેન્ડ કરવામાં આવ્યા હતા. હવે તેઓ આગામી ઘણા વર્ષો સુધી ICC અથવા અન્ય માન્યતા પ્રાપ્ત કોઈપણ આંતરરાષ્ટ્રીય કે સ્થાનિક ક્રિકેટ સ્પર્ધામાં ભાગ લઈ શકશે નહીં.

અખિલેશ રેડ્ડીનું ક્રિકેટ કરિયર

26 વર્ષીય બોડુગુમ અખિલેશ રેડ્ડી ભારતીય મૂળના હોવા છતાં અમેરિકાની રાષ્ટ્રીય ક્રિકેટ ટીમ માટે રમ્યા હતા. તેમણે અમેરિકા તરફથી 4 T20 આંતરરાષ્ટ્રીય મેચ રમી હતી અને 1 વિકેટ પણ ઝડપી હતી. તેમણે નોર્થ અમેરિકા T20 કપમાં કેમેન આઇલેન્ડ્સ સામે આંતરરાષ્ટ્રીય ક્રિકેટમાં ડેબ્યૂ કર્યું હતું. જોકે તેમનું આંતરરાષ્ટ્રીય કરિયર લાંબું રહ્યું નહોતું.

ભારત સાથે પણ છે ખાસ જોડાણ

અખિલેશ રેડ્ડીનો ક્રિકેટ પ્રવાસ ભારત સાથે પણ નજીકથી જોડાયેલો રહ્યો છે. તેમનો જન્મ અમેરિકામાં થયો હતો, પરંતુ તેઓ હૈદરાબાદમાં ઉછર્યા હતા. સ્થાનિક ક્રિકેટમાં સારા પ્રદર્શનના આધારે તેમને વિજય હજારે ટ્રોફી માટે હૈદરાબાદની સંભવિત ટીમમાં સ્થાન મળ્યું હતું, જોકે તેમને અંતિમ પ્લેઇંગ ઇલેવનમાં તક મળી નહોતી. તે ઉપરાંત તેઓ IPL ફ્રેન્ચાઇઝી સનરાઇઝર્સ હૈદરાબાદ (SRH) માટે નેટ બોલર તરીકે પણ કામ કરી ચૂક્યા હતા. એક ઇન્ટરવ્યૂમાં તેમણે જણાવ્યું હતું કે નેટ પ્રેક્ટિસ દરમિયાન તેમણે શિખર ધવન અને મનીષ પાંડે જેવા અનુભવી બેટરોને પોતાની બોલિંગથી આઉટ કર્યા હતા.

અમેરિકા જવાનો નિર્ણય અને પછીનો સફર

વધુ સારી તકોની શોધમાં અખિલેશ રેડ્ડી બાદમાં અમેરિકા પરત ફર્યા અને ત્યાંની રાષ્ટ્રીય ટીમ સુધી પહોંચવામાં સફળ રહ્યા. તેમનું કરિયર ધીમે ધીમે આગળ વધી રહ્યું હતું, પરંતુ અબુ ધાબી T10 લીગમાં થયેલા આ વિવાદે તેમની સમગ્ર કારકિર્દી પર પ્રશ્નચિહ્ન મૂકી દીધું છે. ક્રિકેટમાં ખેલાડીની પ્રતિભા જેટલી મહત્વપૂર્ણ હોય છે, એટલી જ તેની પ્રામાણિકતા પણ મહત્વ ધરાવે છે. ICCના આ નિર્ણયથી સ્પષ્ટ થાય છે કે રમતની વિશ્વસનીયતા જાળવવા માટે કોઈપણ પ્રકારના ભ્રષ્ટાચાર, મેચ ફિક્સિંગ અથવા પુરાવા નષ્ટ કરવાના પ્રયાસને ગંભીરતાથી લેવામાં આવશે.

આ પણ વાંચો : Shubman Gill ICC Ranking : વનડે ક્રિકેટમાં શુભમન ગિલ બન્યા વિશ્વના નંબર 1 બેટ્સમેન, 15 વર્ષના વૈભવ સૂર્યવંશીએ મચાવી ધમાલ