સોનલ દિનુષાએ ભારતની ઍજીત રોકી
કોલંબો ટેસ્ટમાં શ્રીલંકા (Sri Lanka) માટે યુવા બેટર સોનલ દિનુષા (Sonal Dinusha) સૌથી મોટા હીરો બનીને સામે આવ્યો. તેણે મેચની બંને ઇનિંગ્સમાં શાનદાર સદી (Century) ફટકારીને ભારતની જીતની આશાઓ પર પાણી ફેરવી દીધું. દિનુષાએ પ્રથમ ઇનિંગ્સમાં 162 બોલનો સામનો કરીને 103 રન બનાવ્યા હતા. ત્યારબાદ બીજી ઇનિંગ્સમાં તેણે 264 બોલ રમીને અણનમ 133 રનની શાનદાર ઇનિંગ રમી હતી. તેના જબરદસ્ત પ્રદર્શનને કારણે શ્રીલંકા ફોલોઓન બાદ પણ મેચ બચાવવામાં સફળ રહ્યું.
શ્રીલંકાએ ભારતના 503/9 ડિકલેર (Declared)ના જવાબમાં પ્રથમ ઇનિંગ્સમાં 290 રન બનાવ્યા હતા. ત્યારબાદ ભારતે શ્રીલંકાને ફોલોઓન આપ્યું. જોકે બીજી ઇનિંગ્સમાં યજમાન ટીમના બેટર્સે જબરદસ્ત સંઘર્ષ કર્યો અને 429/9ના સ્કોર પર ઇનિંગ્સ ડિકલેર કરીને મેચ ડ્રો કરાવી. દિનુષા 1997 બાદ શ્રીલંકાનો એવો પ્રથમ બેટર પણ બન્યો છે, જેણે ટેસ્ટ મેચની બંને ઇનિંગ્સમાં સદી ફટકારી છે.
WTC પોઈન્ટ્સ ટેબલમાં ભારતને નુકસાન
જો ભારત કોલંબો ટેસ્ટ જીતી ગયું હોત તો તેને 12 પોઈન્ટ્સ મળ્યા હોત. આ સ્થિતિમાં ટીમ ઈન્ડિયાનું પોઈન્ટ્સ પર્સેન્ટેજ (PCT) વધીને 63.33 થઈ જાત અને ભારત WTC પોઈન્ટ્સ ટેબલમાં ચોથા સ્થાન પર પહોંચી શક્યું હોત. પરંતુ મેચ ડ્રો થતાં ભારત અને શ્રીલંકા બંનેને 4-4 પોઈન્ટ્સ મળ્યા. પરિણામે ભારતનું PCT 53.33થી ઘટીને 51.51 થઈ ગયું છે. જોકે ટીમ ઈન્ડિયા હજુ પણ WTC ટેબલમાં પાંચમા ક્રમે છે. શ્રીલંકાનું PCT 33.33 પર યથાવત છે અને તે 9 ટીમોની પોઈન્ટ્સ ટેબલમાં છઠ્ઠા સ્થાને છે.
ઓસ્ટ્રેલિયા સૌથી આગળ
વર્લ્ડ ટેસ્ટ ચેમ્પિયનશિપ ફાઇનલ (WTC Final)ની રેસમાં હાલમાં ઓસ્ટ્રેલિયા (Australia) સૌથી આગળ છે. બાંગ્લાદેશ સામેની બીજી ટેસ્ટમાં મોટી જીત મેળવ્યા બાદ ઓસ્ટ્રેલિયાનું PCT વધીને 80 થઈ ગયું છે. મોજૂદા ચેમ્પિયન દક્ષિણ આફ્રિકા (South Africa) 75ના PCT સાથે બીજા ક્રમે છે. ન્યૂઝીલેન્ડ (New Zealand) ત્રીજા અને બાંગ્લાદેશ (Bangladesh) ચોથા સ્થાને છે.
ટીમ ઈન્ડિયાની નજર WTC ફાઇનલ પર
શ્રીલંકા સામે ટેસ્ટ સિરીઝ જીત્યા બાદ હવે ટીમ ઈન્ડિયાનું ધ્યાન વ્હાઇટ બોલ ક્રિકેટ (White Ball Cricket) તરફ રહેશે. ભારતનો આગામી ટેસ્ટ મુકાબલો નવેમ્બરમાં ન્યૂઝીલેન્ડ પ્રવાસ દરમિયાન રમાશે. મોજૂદા WTC સાયકલ (WTC Cycle)માં ભારતે હજુ 7 ટેસ્ટ રમવાના છે. તેમાં ન્યૂઝીલેન્ડ સામે 2 અને ઘરઆંગણે ઓસ્ટ્રેલિયા સામે 5 ટેસ્ટનો સમાવેશ થાય છે. બીજી તરફ શ્રીલંકા નવેમ્બરમાં પાકિસ્તાન પ્રવાસ (Pakistan Tour) દરમિયાન આગામી ટેસ્ટ રમશે.
શ્રીલંકાને વર્તમાન WTC ચક્રમાં હજુ 4 ટેસ્ટ રમવાના છે, જેમાં પાકિસ્તાન અને ન્યૂઝીલેન્ડ સામે 2-2 મેચ સામેલ છે. ટીમ ઈન્ડિયા માટે શ્રીલંકા સામે સિરીઝ જીત ચોક્કસપણે મહત્વપૂર્ણ છે, પરંતુ WTC ફાઇનલમાં પહોંચવા માટે હવે બાકીની મેચોમાં સતત જીત મેળવવી વધુ જરૂરી બની રહેશે. કોલંબો ટેસ્ટનો ડ્રો ભારત માટે યાદ અપાવે છે કે ફાઇનલની રેસમાં દરેક પોઈન્ટ કેટલો મહત્વનો છે.
આ પણ વાંચો : Sonal Dinusha Record : ટીમ ઈન્ડિયા સામે શ્રીલંકન બેટરનું વાવાઝોડું, સળંગ 4 ઇનિંગ્સમાં 50+ રન ફટકારી દુનિયાને ચોંકાવી!
